စိတ်ကူးနဲ့ လက်တွေ့ဆိုတာ...

ဘ၀ပေးအခြေအနေအရ၊ ရေကြည်ရာ မြက်နုရာဆိုသလို အရှေ့တောင်အာရှနယ်နိမိတ်အတွင်းရှိ ပြည်ပနိုင်ငံငယ်လေး တစ်ခုတွင် နှစ်တွေအကြာကြီး ကျွန်တော်အလုပ်လုပ်ခဲ့ရသည်။ ကြိုးစားရှင်သန် ရပ်တည်ခဲ့ရသည်။ အိပ်မက်တွေကို အကောင်အထည် ဖော်ဖို့ကြိုးစားခဲ့ရသည်။

နေရတာက ခြောက်ထပ်မြင့်သည့် အဆောက်အဦးကြီးတစ်ခု၏ နှစ်လွှာမြောက် တိုက်ခန်းတစ်ခန်း အတွင်းမှာ။ ထိုတိုက်ခန်းေ လးထဲတွင် အိပ်ခန်းသုံးခန်း၊ ရေချိုးခန်းနှစ်ခန်း၊ မီးဖိုတစ်ခန်းနှင့် ဧည့်ခန်းတစ်ခန်း ပါ၏။ နေရတာက စုစုပေါင်း (မြန်မာလူမျိုး ချည်း) ကိုးဦး။ ပြောရမည်ဆိုလျှင်တော့ အိပ်ခန်းတစ်ခန်းတွင် လူသုံးဦးနေရ၏။

အလုပ်က လျှပ်စစ်ပစ္စည်းများထုတ်လုပ်သော စက်ရုံတစ်ရုံတွင်ဖြစ်၏။ အလုပ်ချိန်က မနက်ဆိုင်းဆိုလျှင် မနက် ၈နာရီမှ၊ ည၈ နာရီအထိ။ ညဆိုင်းဆိုလျှင် ည၈နာရီမှ မနက် ၈နာရီအထိ။ တစ်နေ့ကို ဆယ့်နှစ် နာရီတိတိ။

လူကသာ ပြည်ပနိုင်ငံမှလူမျိုးခြားများကြားတွင် လျှပ်စစ်ပစ္စည်းများ ထုတ်လုပ်မှုလုပ်သားအဖြစ် အလုပ်နေရသော်လည်း ကျွန်ေ တာ့်ဝါသနာက တခြား။ အခုလိုမျိုး မတောက်တခေါက် စာတိုပေစ,လေးများ ရေးသားခြင်း၊ စာအုပ်များဖတ်ခြင်း၊ သီချင်း များနားထောင်ခြင်း၊ ဟိုခေါက် ဒီခေါက် ဂစ်တာတီးခြင်းနှင့် နား အေးပါးအေးနေလိုခြင်း တို့ပင်ဖြစ်၏။

ထိုအထဲတွင် အပြင်းထန်ဆုံးသောဝါသနာက စာဖတ်ခြင်းပင်။ နေ့တိုင်း စာဖတ်ဖြစ်သည်။ မဖတ်ရလျှင် မနေနိုင်ပါ။ ဖတ်စရာ မရှိလျှင် အဟောင်းများပြန်ဖတ်သည်။ ကိုယ်ရေးထားသော စာများအားပြန် ဖတ်သည်။ ဂစ်တာတီးခြင်း၊ သီချင်းနားထောင်ခြင်းနှ င့် စာရေးခြင်းစသည့် ကျန်သောဝါသနာများအား မလုပ်မိသောနေ့ရှိချင်ရှိမည်။ စာဖတ်ခြင်းက အမြဲပင် စဉ်ဆက်မပြတ်။

သို့သော်လည်း ကျွန်တော့်မှာ အေးအေးဆေးဆေးဖြင့် စာဖတ်ရသော အချိန်က ရှားပါးလွန်းလှသည်။ များသောအားဖြင့် ကျွန်ေ တ်ာစာဖတ်ရသည့်နေရာက အိမ်မှာဖြစ်၏။ ကျွန်တော်နေသောအိမ်တွင် စာစောကပြောခဲ့သလို နေသူကိုးဦးရှိသည်။ ကျွန်တော့် အိပ်ခန်းအတွင်းမှာလည်း အခြားအခန်းဖော်နှစ်ဦးရှိ သေးသည်။ ထို့ကြောင့် အိပ်ခန်းအတွင်း ကျွန်တော်စာဖတ်နေချိန်တွင် သူ တို့က ၀င်လိုက်ထွက်လိုက်၊ ကျွန် တော့်ကိုလာပြီး စကားပြောလိုက်နှင့်မို့ အာရုံပျက်စီးရသည်။ ဧည့်ခန်းမှာကျတော့လည်း ရုပ် ရှင်ကြည့်သူ၊ တစ်ခါတစ်လေ ကာရာအိုကေဆိုသူများနှင့်မို့ ကျွန်တော့်မှာ နားအေးပါးအေး စာသိပ်မဖတ်ခဲ့ရပါ။ ထို့ကြောင့် တစ်ခါ တစ်ရံအချိန်များတွင် ပြတင်းဝဆီမှမျှော်ကြည့်လျှင်မြင်ရသော သစ်ပင်များကိုကြည့်ကာ ကျွန်တော်စိတ်ကူးယဉ်မိတတ်သည်။

အခြားတော့မဟုတ်...။ အရိပ်ကောင်းသော သစ်ပင်တစ်ပင်အောက်တွင် အေးအေးဆေးဆေး တစ် ယောက်တည်းစာဖတ်နိုင်ဖို့ပ င်ဖြစ်သည်။ အချိန်ကြာလာခဲ့သည်နှင့်အမျှ ကျွန်တော့်ရဲ့စိတ်ကူးကို ကိုယ်တိုင် ပြန်ပြီး တပ်မက်လာခဲ့ရတော့သည်။ သို့သော် ဒီနိုင်ငံအတွင်း ကျွန်တော်အလုပ်လုပ်နေရသရွေ့တော့ ထိုစိတ်ကူးက ဖြစ်လာနိုင်မှာမဟုတ်လာခဲ့သေးဟု... သတိရှိရှိပြန်တွေး မိပြန်သည်။ အလုပ်နှင့်အိမ်၊ အိမ်နှင့်အလုပ်၊ အိမ်ပြန်ရောက်ခဲ့တော့လည်း အခန်းဖော်များနှင့်မို့သာ ဖြစ်ပါသည်။

သို့ပေမယ့် တစ်နေ့နေ့တစ်ချိန်ချိန်တွင်တော့ ကျွန်တော့်စိတ်ကူးကို အကောင်အထည်ဖော်ဖြစ်အောင် ဖော်ရမည်ဟု... စိတ်ထဲ တွင် ကျိတ်ကာ တေးထားမိခဲ့ပါသည်။

~~~@~~~

ကျန်းမာရေးအနည်းငယ်ချွတ်ယွင်းသွား၍ ပြည်ပတွင်အလုပ်ဆက်လုပ်ဖို့ ခဲယဉ်းသွားသော အခါတွင် အမိမြေသို့ ကျွန်တော်အပြီးပြန်လာခဲ့တော့၏။ ပြန်ရောက်ကာစမို့ အရာရာကို လွမ်းဆွတ်တမ်းတစွာ တစ်ဝကြီးကျွန်တော်ခံစားမိသည်။ အစားအသောက်မှ အစ၊ မမြင်တွေ့ရတာကြာပြီဖြစ်သော သူငယ်ချင်းများ၊ ဆွေမျိုးများနှင့်တွေ့ဆုံခြင်းက အလယ်၊ မရောက်ဖူးသေးသည့်နေရာများအား အလည်သွားသည်က အဆုံး နှင့် ကျွန်တော့်မှာ အတော့်ကို မိုးမမြင်လေ မမြင်နိုင်အောင် ပျော်ခဲ့၏။

         

နည်းနည်း အနည်ထိုင်လာတော့မှ ပြည်ပတွင်မက်ခဲ့သော ကျွန်တော့်ရဲ့ စိတ်ကူးအိပ်မက်ကို အကောင် အထည်ဖော်ဖို့ကြိုးစားမိတော့သည်။ အရိပ်ကောင်းသည့် သစ်တစ်ပင်အောက်တွင် စာသွားဖတ်ဖို့ပင်။

           

သို့သော် ကျွန်တော့်အိမ်တွင် သစ်ပင်ကြီးကြီးမရှိ။ ရှိလည်း ပတ်ဝန်းကျင်က မတိတ်ဆိတ်။ ထို့ကြောင့် စာအုပ်တစ်အုပ်အား အိတ်ထဲထည့်ကာ အပန်းဖြေရာပန်းခြံတစ်ခုသို့ ကျွန်တော်ထွက်ခဲ့လိုက်သည်။ ဘတ်စ် ကားပေါ်တွင် ခြေထောက်တက်နင်းခံရ၏။ စပယ်ယာက အထဲဝင်စီးဟု..ငေါက်တာကိုလည်း ခံရ၏။ ကား ပေါ်မှဆင်းသောအခါတွင်လည်း တွန်းချတာကို ခံစားလိုက်ရသေး ၏။

            

ပန်းခြံထဲရောက်ခဲ့တော့ လူရှင်းတိတ်ဆိတ်ရာနေရာတွင် အရိပ်ကောင်းသည့် သစ်ပင်ကို ရှာမိသည်။ နေရာတော်တော်များများမှာ စုံတွဲများနှင့်မို့ တော်တော်တော့ ရှာလိုက်ရသည်။ နောက်ဆုံးတွင်တော့ တွေ့၏။ ရေပြင်ဘက်ကို မျက်နှာမူထားသည့် သစ်ပင် တစ်ပင်အောက်တွင် ဖြစ်၏။

ထိုင်စရာ ခုံတန်းမရှိတာမို့ စိမ်းစိုစိုမြက်ခင်းပေါ်တွင် ဒီအတိုင်း ကျွန်တော်ထိုင်ချလိုက်၏။ ထိုအခါ မြက်ပင်များ ၏ အေးမြစွတ်စိုသော အထိအတွေ့ကို အေးခနဲခံစားလိုက်ရသည်။

စာအုပ်ဖွင့်ကာ စာစဖတ်သည်။ သိပ်မကြာလိုက်။ ကျွန်တော်ဇက်ညောင်းလာသည်။ ထို့ကြောင့် အနေအထားပြောင်းကာ ဖတ်သည်။ မကြာခင် ခါးညောင်းလာပြန်သည်။ အနေအထားပြောင်းရပြန်သည်။ ဖတ်ရသည်မှာ သက်တောင့်သက်သာမရှိသလို ခံစားရမိ၏။ ဒီကြားထဲ စာဖတ်ရင်းဇိမ်ခံသည့်အနေဖြင့် စီးကရက် တစ်လိပ်ပြီးတစ်လိပ် ထုတ်ဖွာမိ၏။ ကြာတော့ အာခေါင်ပူကာ ရေငတ်လာပြန်သည်။ ရေသန့်ဘူး မဆောင် ခဲ့မိသောကြောင့် ကိုယ့်ကိုယ်ကိုလည်း အပြစ်တင်မနေချင်တော့။ ထို့အတူ သွားပြီးဝယ်ဖို့ကလည်း အတော် လှမ်းတာမို့ ဒီအတိုင်းပဲ ကျိတ်မှိတ်ကာ အငတ်ခံရင်း စာဆက်ဖတ်နေလိုက်သည်။ 

တော်တော်ကြာတော့ ကျွန်တော့်လည်ဂုတ်ထဲမှ ယားကျိကျိခံစားလာရသည်။ ထို့အတွက် ကမန်းက တန်းထ,ကာ အင်္ကျီကိုခါကြည့်မိတော့ ခါချဉ်ကောင်တစ်ကောင်။ မြန်မြန်ဖယ်ပစ်ရင်း ပြန်မထိုင်ခင် ကျွန် တော့်တင်ပါးနေရာမှ စိုတိစိုစွတ်ခံစားမှုတစ်ခုကြောင့် ကိုယ့်ကိုယ်ကို ပြန်လှည့်ကြည့်မိ၏။ ကျွန်တော့်တင်ပါးနေရာတွင် စိုပြီးကွက်နေသည့် အကွက်တစ်ကွက်ကို တွေ့လိုက်ရသည်။ သွားပြီ..၊ ကျွန်တော့်အတွက် ခက်ပြီ။ ပုဆိုးမ၀တ်ပဲ ပေါ့ပေါ့ပါးပါး ဘောင်းဘီရှည်သာ ၀တ်လာတာမို့ လှည့်ဝတ်လို့မရတော့။ မြက်ခင်းပေါ်တွင် ဘာအခင်းမှ မပါပဲထိုင်မိသော အကျိုးဆက်တစ်ခုဖြစ်၏။

မထူးတော့ပြီမို့ ပြန်ထိုင်ချကာ ကျွန်တော်စာဆက်ဖတ်နေလိုက်သည်။ သို့သော် စာအုပ်ထဲတွင် သိပ်ပြီး အာရုံဝင်စားမှုမရှိတော့။ စိုကွက်နေသည့် ဘောင်းဘီနှင့်အိမ်ပြန်ရမည့်အရေးကို တွေးကာ စိတ်အနှောက်အ ယှက် ဖြစ်နေရသောကြောင့်ပင်ဖြစ်၏။ ကျွန်တော် ၀တ်လာသော တီရှပ်အင်္ကျီလေးမှာ တင်ပါးသိပ်မဖုံး တာက ဆိုးနေသည်။ ကျွန်တော် ဘယ်လိုပြန်ရပါ့မလဲ။ စာအုပ်နှင့်နောက်ကို ကွယ်ကာပြန်ထွက်မည်။ ပန်းခြံ မှအထွက်တွင် တက္ကစီငှားစီးမည်..ဟု တွေးမိမှ စိတ်သက်သာရာရ သလိုရှိ၏။ ထို့ကြောင့် စာဆက်ဖတ်သည်။ မကြာခင် ကျွန်တော့်ဗိုက်က ဆာလောင်လာသလိုရှိလာ၏။ စာအုပ်ကို ဘေးချကာ ခဏတွေးမိသည်။ အိမ်မှာဆိုလျှင် ငါသက်သက်သာသာနဲ့ အိပ်ယာထဲမှာလှဲပြီး စာဖတ်နိုင်တယ်၊ ရေဆိုလည်း အချိန်မရွေးယူ သောက်နိုင်တယ်၊ ခါချဉ်လည်း အတက်ခံရမှာ မဟုတ်ဘူး၊ ငါ့ဘောင်းဘီလည်း ညစ်ပတ်မှာမဟုတ်ဘူး....ဟူ ၍ပင်ဖြစ်၏။

ထို့ကြောင့် စာအုပ်ကိုပိတ်ကာ အိမ်ပြန်ဖို့ပြင်မိ၏။

~~~@~~~

  

အိမ်အပြန်လမ်းတွင် တက္ကစီတစ်စီး၏နောက်ခန်းမှာ လိုက်ပါစီးနင်းရင်း ကျွန်တော်တစ်ယောက်တည်း အတွေးနယ်ချဲ့နေမိသည်။

သစ်ပင်တစ်ပင်အောက်တွင် အေးအေးဆေးဆေးဖြင့် စာဖတ်ချင်ခဲ့သောဆန္ဒကို ဒီနေ့ကျမှ ကျွန်တော် အကောင်အထည်ဖော်ဖြစ်ခဲ့ရ၏။ သို့သော် ကျွန်တော်စိတ်ကျေနပ်မှု အပြည့်အ၀ ရခဲ့ပါရဲ့လားဟု ကိုယ့်ကိုယ်ကို ပြန်မေးနေမိသေးသည်။

မည်သို့ပင်ဖြစ်ပါစေ...။

စိတ်ကူးနှင့်လက်တွေ့တို့သည် တကယ်တမ်းတွင် အမှန်ကွာခြားတတ်ကြောင်းကို ဒီနေ့တွင် လက်တွေ့ အနေဖြင့် ကျွန်တော်ထပ်မံခံစားသိရှိခဲ့ရပြီဖြစ်၏။    ။

~~~@~~~

ချစ်ခြင်းအားဖြင့်...

~ဏီလင်းညို~

12^th June 2011.

19:25 P:m.

Sunday.

(စိတ်ကူးနဲ့ လက်တွေ့ဆိုတာ.....)

(ရန်ကုန် - မြန်မာပြည်)

အသံများနှင့်....

မိုးအကုန်ဆောင်းအကူး တစ်ခုသောနေ့စွဲတွင် ခရီးတိုလေးတစ်ခု ကျွန်တော်ထွက် ဖြစ်ခဲ့သည်။ရန်ကုန်- ပြည် အဝေးပြေးကားလမ်းမကြီးပေါ်မှ တောမြို့လေးတစ်မြို့ဆီသို့သာ ဖြစ်၏။ ထိုမြို့လေးရှိ ကျွန်တော်တည်းခိုသော ဆွေမျိုးများ၏အိမ်မှာ ကားလမ်းမကြီး၏နံ ဘေးတွင်ရှိသည်။ အိမ်ခြံဝင်းအရှေ့မှ ခြေလှမ်းနှစ်ဆယ်စာလောက် လျှောက်လျှင်ပင် ကားလမ်းမကြီးပေါ်သို့ ရောက်နိုင်၏။

         ထိုကားလမ်းမကြီးကို ကျော်လွန်ကာ အနည်းငယ် လမ်းလျှောက်မိလျှင်တော့ ကား လမ်းမကြီးနှင့် အပြိုင်သဖွယ်တည်ရှိနေသော မီးရထားလမ်းတစ်ခုကို တွေ့နိုင်သည်။ ထိုမီးရ ထားလမ်းလေး၏နံဘေးတွင် ခပ်အိုအို ဘူတာရုံလေးတစ်ရုံက မှုန်ကုပ်ကုပ်နိုင်စွာဖြင့် တည် ရှိနေခဲ့၏။

        ကျွန်တော်တည်းခိုသောအိမ်ရှေ့ရှိ ခုံတန်းလျားလေးဆီမှ လှမ်းမျှော်ကြည့်လျှင် ကား လမ်းမ၏ ဟိုဘက်တစ်ခြမ်းဆီက မီးရထားဘူတာရုံလေးကို (မျက်နှာခြင်းဆိုင်အနေအထား မို့) အမြဲလိုလို တွေ့နေရတတ်ပါသည်။ ဘာရယ်မဟုတ်ပဲ အမြဲလိုလိုမြင်တွေ့နေခဲ့ရသောအ ခါ ကျွန်တော့်အာရုံထဲတွင် ထိုဘူတာရုံလေးနှင့်ပတ်သတ်နေခဲ့သော မေးခွန်းတချို့က မသိ မသာ ကပ်ငြိလာခဲ့ရလေတော့၏။

~~~@~~~

     သန်းခေါင်ယံလွန်ခါစ, ညတစ်ညတွင် ထိုဘူတာရုံလေးရှိရာဆီသို့ တိတ်တဆိတ် ဆန်စွာဖြင့် ကျွန်တော်ရောက်ရှိသွားခဲ့သည်။ ဘူတာရုံအမိုး တံစက်မြိတ်အောက်သို့ ကျွန် တော်ဝင်လိုက်သောအခါ နှင်းမှုန်စ,များကြားတွင် ငိုက်မြည်းနေခဲ့ဟန်ရှိသော ဘူတာရုံလေး ဆီမှ...

        “ကောင်းသောအချိန်အခါပါ ကောင်လေးရေ့”.. ဟူသော နှုတ်ဆက်လိုက်သံက နွေး ထွေးစွာ ထွက်ပေါ်လာ၏။ ထိုအသံကြောင့် ကျွန်တော့်စိတ်ထဲ မခံချင်မိသလိုလို ဖြစ်သွား ရသည်။ တကယ်တော့ ကျွန်တော့်အသက်အရွယ်သည်‘ကောင်လေး’...ဟု ခေါ်ခံရမည့် အရွယ် မဟုတ်တော့ပါ။

လူလတ်ပိုင်းဘ၀သို့ပင် စတင်ချဉ်း နင်းဝင်ရောက်စ,ပြုနေခဲ့ရပြီမို့သာတည်း။

       “ကျွန်တော့်အရွယ်က ကောင်လေးလို့ ခင်ဗျားခေါ်ရမယ့်အရွယ်မဟုတ်တော့ဘူး ထင် ပါတယ်”...

         အစာမကြေသည့် အရိပ်အယောင်များ ပြည့်သိပ်ပျော်ဝင်နေခဲ့သောလေသံဖြင့် ကျွန် တော့်ရဲ့တုန့်ပြန်လိုက်သံက ခပ်ဆတ်ဆတ်ဖြစ်နေခဲ့မှန်း ဘာသာပြန်သတိထားမိလိုက်၏။ သို့သော် ဘူတာရုံလေးက နားလည်ခွင့်လွှတ်တတ်သော လေသံဖြင့် ကျွန်တော့်ကိုတုန့်ပြန် ပြောသည်။

        “ငါ့ရဲ့ရပ်တည်မှုနဲ့ဖြစ်တည်မှုက မင်းရဲ့လက်ရှိအသက်အရွယ်ထက် အများကြီးပိုစော ခဲ့လို့ မင်းကိုငါက ကောင်လေး...လို့ခေါ်မိတာ စိတ်မဆိုးပါနဲ့ကွာ။ ဥပမာ.. မိဘတွေက သား သမီးတွေရဲ့အသက် ဘယ်လောက်ပဲကြီးကြီး၊ အရွယ်ဘယ်လောက်ပဲရရ သူတို့မျက်စိထဲ မှာ ‘ကလေး’လို့ ထင်မြင်နေတတ်ကြသလိုမျိုးပေါ့ကွာ”

         “ထားလိုက်ပါတော့ဗျာ။ ဒါဆိုလည်း ရပါတယ်”...

         အကြောင်းအကျိုး ဆီလျှော်ညီညွတ်နေခဲ့သောစကားမို့ ကျွန်တော်ကြေအေးလိုက် တော့ ဘူတာရုံလေးက ခပ်သဲ့သဲ့ပြုံးရင်း....

       “ကောင်းတယ်၊ ဘာမှမဖြစ်လောက်တဲ့၊ မကြီးကျယ်တဲ့ကိစ္စတွေကို ‘ဇာ’မချဲ့တတ်တာ ကောင်းတယ်။ ဒါနဲ့နေပါဦး...၊ ညကြီးအချိန်မတော် မင်းကဒီကို ဘာလာလုပ်တာတုန်းကွ”

         “ကျွန်တော်မှာ ခင်ဗျားကိုမေးစရာ မေးခွန်းတချို့ရှိနေခဲ့လို့ပါ”

         “ဟေ”...

         ဘူတာရုံလေးဆီမှ အာမေဋိတ်သံက အေးစက်စက်ဆောင်းညတွင် ခပ်အုပ်အုပ်မြည် ဟည်း ထွက်ပေါ်လာ၏။ ကျွန်တော်ခေါင်းငြိမ့်ပြရင်း...

         “ဟုတ်တယ်..၊ အဲ့ဒါကြောင့် ဒီအချိန်ကြီး ကျွန်တော်တစ်ယောက်တည်း ထွက်လာခဲ့ တာ”...

         “ဘာတွေများ မေးချင်ရတာလဲကွ။ ငါက အသက်ကြီးနေပြီဆိုတော့ ငါ့ရဲ့အတွေးအ ခေါ်တွေက မင်းတို့ခေတ်စကားနဲ့ပြောရရင် ဒိတ်အောက်ချင်အောက်နေမှာနော်...။ မင်းပြန် စဉ်းစားလိုက်ဦး”...

        “ရပါတယ်။ ကျွန်တော်မေးချင်တဲ့မေးခွန်းတွေကို ခင်ဗျားကိုယ်တိုင်ဖြေပေးရင် ရပါပြီ။ အဓိက,ကတော့ ကျွန်တော့်မေးခွန်းတွေအပေါ်မှာထားတဲ့ ခင်ဗျားရဲ့သဘောထားတွေကို တိုက်ရိုက် ကြားချင်လို့ပါပဲ”...

         “အထူးအဆန်းပါလားကွ။ ကဲပါလေ... ဆိုစမ်းပါဦး”

         “ဒီလိုဗျာ...၊ ဒီမြို့လေးကို ကျွန်တော်ရောက်ကာစကတည်းက ခင်ဗျားကိုကြည့်နေမိတယ်”...

        “ဘာဖြစ်လို့ ငါ့ကိုအမြဲကြည့်နေရတာလဲကွ။ ငါက မင်းတို့လိုအရွယ်တွေသဘောကျ မယ့် ကောင်မလေးတွေလို ရုပ်ရည်ရှိတာလည်းမဟုတ်...၊ လှတပတလေးလည်းမဟုတ်”

         ဘူတာရုံလေး၏အသံက ရယ်သံစွက်လျှက်။ ထို့ကြောင့် ကျွန်တော်လက်ကာပြမိရင်း...

         “အဲ့ဒီလိုသဘောမျိုး မဟုတ်ပါဘူးဗျ။ ခင်ဗျားကလည်းလေ”...

         “အေးပါ၊ ငါက နောက်တာပါ။ ကဲ ဘာမေးမှာလဲ၊ မေးစရာရှိတာကို မြန်မြန်မေး။ ည နက်နက်ကြီး အပြင်ဘက်မှာ မင်းတစ်ယောက်တည်းရယ်”...

      “ဟုတ်ကဲ့။ ကျွန်တော်မေးချင်တာက ဒီလိုဗျာ။ အခုအချိန်က တန်းဆောင်တိုင်ကျောင်း ပိတ်ရက်ဆိုတော့ ခင်ဗျားရဲ့အမိုးအောက်မှာ ကလေးတွေလာလာပြီးဆော့ကြတာ ခင်ဗျား နားမညည်းဘူးလားလို့ပါ”...

         “ဟေ...၊ မင်းမေးခွန်းကလည်း အဆန်းပါလား”...

       ကျွန်တော်ပြန်မဖြေ။ သိချင်နေခဲ့သောအရာမို့ ဘူတာရုံလေးဆီကအဖြေစကားကို နား စွင့်ရင်း တိတ်တဆိတ် နေလိုက်မိ၏။

         “အေးပါ။ မင်းမေးခွန်းကို ငါဖြေပါ့မယ်။ ဒါပေမယ့် မင်းမေးခွန်းကိုငါမဖြေခင် ငါ့မေး ခွန်းကို မင်းအရင်ဖြေရမယ်၊ ဘယ်လိုလဲ”...

         “ဘာမေးမှာလဲဗျ”...

         “ဒီလိုကွာ၊ မင်းတို့လိုအရွယ်ရောက်နေတဲ့လူတွေဟာ အခုလိုအရွယ်မရောက်ခင်မှာ ‘ကလေးဘ၀’ကို မဖြတ်သန်းခဲ့ရတဲ့လူ ဘယ်နှစ်ယောက်လောက်များရှိမလဲ”

         “ဘယ်ရှိမလဲဗျ။ အားလုံးပဲ ကလေးဘ၀ဆိုတာကို ကိုယ်စီကိုယ်ငှ မဖြစ်မနေဖြတ် သန်းခဲ့ကြရမှာပေါ့”

         “ဟုတ်ပြီ။ ဒါဆို မင်းတို့ကလေးဘ၀တုန်းက ဆူဆူညံညံကစားခဲ့တာတွေကို အဲ့ဒီအချိန်တုန်းက မင်းတို့ ကိုယ်မင်းတို့ နားညည်းစရာလို့ရော ထင်ခဲ့မိသလား”

         “ဟင့်အင်း”

         ကျွန်တော်ခေါင်းကို ခပ်သွက်သွက်ယမ်းရင်း ပြန်ဖြေမိ၏။ ထိုအခါ ဘူတာရုံလေးက ခပ်အုပ်အုပ်အသံ ဖြင့်ရယ်မောရင်း...

         “ကဲ... အဲ့ဒါ ငါ့ရဲ့အဖြေပဲကောင်လေးရ”...

         “ဘာလဲဗျ၊ ခင်ဗျားအဖြေက”...

         “ရှင်းရှင်းလေးပါကွာ၊ လူတိုင်းမှာ ကလေးဘ၀ဆိုတာ ရှိခဲ့ကြတယ်။ ကလေးဘ၀မှာ ကလေးတွေက ကလေးပီပီကစားတာ၊ ဆူညံတာကို ငါကနားညည်းတယ်ဆိုပြီး အပြစ်သွား ယူလို့ဖြစ်မလားကွ။ ကလေးတွေရဲ့ အသက်ထက်ကြီးတဲ့ ငါတို့တွေက သည်းခံခွင့်လွှတ် ရင်း ဒီလိုပဲနားလည်ပေးရမှာပေါ့။ မဟုတ်ဘူးလား”

         ကျေနပ်စွာဖြင့် ကျွန်တော်ခေါင်းငြိမ့်မိ၏။

         “ဟုတ်ပါပြီဗျာ။ ဒါဆို နောက်တစ်ခုလောက် မေးပါရစေဦး။ ညနေပိုင်းတွေဆိုရင် ခင် ဗျားနားမှာ ကောင်လေးတွေ၊ လူငယ်၊ လူရွယ်၊ လူလတ်ပိုင်းတွေ ၀ိုင်းခြင်းခတ်ကြ၊ ပိုက် ကျော်ခြင်းခတ်ကြရင်း ငြင်းကြခုန်ကြတဲ့ အသံတွေနဲ့ ညဘက်ဆို ခင်ဗျားရဲ့ပတ်ဝန်းကျင်မှာ ဂစ်တာတီးပြီး သီချင်းဆိုကြတာတွေကိုရော ခင်ဗျားရဲ့စိတ်ထဲမှာ နားညည်းတယ်လို့ မထင်မိဘူးလား”

         “ဟင့်အင်း၊ လူငယ်ဘ၀မှာ အပြစ်ကင်းတဲ့ ပျော်ရွှင်မှုမျိုးနဲ့ပျော်ရွှင်တာကို ငါတို့က နားလည်ပေးရမှာပေါ့ကွ။ အဲ့ဒါကိုသွားပြီး ဆူပူကြိမ်းမောင်းပြစ်တင်မယ်ဆိုလို့ရှိရင် အပြစ်မ ကင်းတဲ့ပျော်ရွှင်မှုမျိုးတွေနဲ့ သူတို့တွေ မွှေ့လျှော်သွားရင် မခက်ဘူးလား”...

       ညကတဖြည်းဖြည်း တိုးလို့နက်ရှိုင်းလာ၏။ တံစက်မြိတ်အစွန်းမှ လှမ်းမြင်နေခဲ့ရသော ကောင်းကင်ပြင်တွင် လက မပြည့်ဝသေးသော်လည်း ကြယ်စင်များခြံရံလျှက် ရင့်ကျက်စွာ လင်းဖျာနေခဲ့၏။

         “ဟုတ်ပါပြီဗျာ။ နောက်ပြီး မေးချင်သေးတာက ရထားဆိုက်တဲ့အချိန်တွေမှာ ခရီး သည်တွေရဲ့ တက်သံ၊ ဆင်းသံ၊ ဈေးသည်တွေရဲ့ အော်သံတွေကိုရော ဆူတယ်လို့ မထင်မိဘူးလား”

         “ဟင့်အင်း၊ ကိုယ့်ခရီးကိုယ်သွားကြရင်း အမှတ်တမဲ့ထွက်လာတတ်တဲ့ အသံတွေကို နားညည်းစရာလို့ ငါတော့မထင်မိပါဘူး။ ဒါနဲ့ မင်းလမ်းလျှောက်ရင် ထွက်လာတတ်တဲ့ မင်းရဲ့ခြေသံကိုရော နားညည်းစရာလို့ မင်းမထင်မိဘူးလား”...

      ခေါင်းယမ်းရင်း ကျွန်တော်ပြန်ဖြေမိသည်။

      “ဟင့်အင်း၊ မထင်မိဘူးဗျ”...

      “ကိုယ့်ခြေသံကိုကျတော့ ကိုယ်နားမညည်း၊ ကိုယ့်အသံကျယ်တော့ ကိုယ်နားမညည်း၊ သူများလုပ်ရင်မကောင်း၊ကိုယ်လုပ်ရင်အကောင်းထင်တတ်တာတွေဟာ စိတ်ဓာတ်ကောင်း ကောင်းမဖွံ့ဖြိုး၊ မရင့်ကျက်တဲ့သူတွေရဲ့ လက္ခဏာတစ်စိတ်တစ်ဒေသပဲကွ။ ပြီးတော့ ထ မင်းတစ်လုပ်စားရဖို့အတွက် ရိုးသားစွာ စီးပွားရှာနေကြတဲ့သူတွေရဲ့အသံကိုလည်း ငါ့အနေ နဲ့ နားညည်းစရာရယ်လို့ မသတ်မှတ်ပါဘူးကွာ”...

         “ဒါဆိုရင်... မရိုးသားတဲ့နည်းနဲ့ စီးပွားရှာတတ်ကြတဲ့သူတွေရဲ့အသံကိုတော့ ခင်ဗျား က နားညည်းစရာ လို့သတ်မှတ်မယ်ပေါ့”

         သွေးတိုးစမ်းသလို ကျွန်တော်မေးမိတော့ ဘူတာရုံလေးက ခေါင်းကိုခပ်ဖြည်းဖြည်း ယမ်းလေသည်။

         “အဲ့ဒီလိုအသံမျိုးတွေကိုလည်း ငါနားမညည်းပါဘူး။ နားမညည်းတဲ့အပြင် ဂရုဏာ စိတ်နဲ့တောင်မှ နားထောင်ပေးမိသေးတယ်။ ဘာဖြစ်လို့လဲဆိုတော့ ၀မ်းဝရုံအပြင် ပိုမစား နိုင်ကြတဲ့ ဘ၀ကိုယ်စီနဲ့လူအချင်းချင်းမှာ လှည့်ဖျားမှုတွေကြောင့် သံသရာမှာ ဆင်းရဲဒုက္ခ ရောက်ကြ၊ တွေ့ကြရဦးမှာပဲဆိုတာကို တွေးမိလို့ပါကွာ”...

         “သြော်... ဒီလိုကိုး၊ အခုလိုဖြေပေးတာ ကျေးဇူးပါပဲဗျာ။ နောက်ထပ်မေးချင်တာက ရထားမလာခင်အချိန်မှာ ခရီးသည်တွေက ခင်ဗျားအမိုးအောက်မှာ ရထားစောင့်ရင်း သူတို့ ဘ၀တွေကို စိတ်ပျက်ညည်းညူကြတဲ့ အခါမှာရော ခင်ဗျားဘယ်လိုနေလဲ”....

         “ဘယ်လိုမှ မနေဘူး။ ခရီးသည်တွေမှ မဟုတ်ဘူး။ လူတိုင်း ကိုယ့်ဘ၀ကို ကိုယ်ပြန် စိတ်ညစ်ဖူးကြမှာ ချည်းပဲလေ။ ကိုယ့်လက်ရှိအခြေအနေကို ပြန်ကျေနပ်နေတတ်တဲ့သူက ခပ်ရှားရှားမဟုတ်လားကွ”...

         “ဟုတ်တော့ ဟုတ်ပါတယ်။ ဒါပေမယ့် ကျွန်တော်ကတော့ ကောင်းတဲ့အသံတွေကို ပဲ နားထောင်လို့ရတာ။ ညည်းတာတို့ ဘာတို့ဆိုရင် နားမထောင်ချင်ဘူး။ နားညည်းတယ် ထင်တာ”...

         “နားလည်မှုနဲ့ နားထောင်ပေးရတာပေါ့ကွာ။ မင်းရဲ့အကျင့်ကိုလည်း မကောင်းဘူး လို့မဆိုလိုပါဘူး။ လူတိုင်းဟာ ကောင်းတာကိုမှ ကြိုက်တတ်ကြတာ၊ ဖြစ်ချင်ကြတာချည်းပဲဟာ။ အဲ့... လူပီသဖို့အတွက်ဆိုရင်တော့ ကောင်းတာရော၊ ဆိုးတာကိုပါ ဝေမျှခံစားတတ် ဖို့လိုမယ်ထင်တယ်ကွ”...

         “ဟုတ်ကဲ့ပါဗျာ။ ကျွန်တော်မှတ်ထားပါ့မယ်။ နောက်ဆုံးမေးခွန်းအနေနဲ့ မေးခွင့်ပြု ပါဦး။ ခင်ဗျားဆီကို ရထားတွေဝင်လာတဲ့အခါ၊ ထွက်သွားတဲ့အခါတွေမှာ ဆူညံတယ်လို့ မ ထင်မိဘူးလား။နောက်ပြီး ခင်ဗျားကတောမြို့လေးက ဘူတာရုံသေးသေးလေးဆိုတော့ ခင်ဗျားဆီမှာမရပ်ပဲ ဆက်ခုတ်သွားတဲ့ အမြန်ရထားတွေရဲ့အပေါ်မှာရော ဘယ်လိုခံစားမိလဲ”

         “ဟ... ငါက ဘူတာရုံဆိုမှတော့ ရထားတွေရဲ့အသံကို ဆူညံတယ်လို့မှတ်ရင် ရမ လားကွ။ မင်းမသိရင် မှတ်ထား၊ ကိုယ်လုပ်တဲ့အလုပ်ရဲ့အသံတွေကို နားမစွင့်ပဲ နားညည်းတယ်လို့ မှတ်ထင်တတ်ကြတဲ့သူတွေဟာ လုပ်ငန်းခွင်မှာ အောင်မြင်မှုတွေနည်းပါးတတ်ကြတယ်ကွ။ အလုပ်နဲ့ပတ်သတ်တဲ့.... ကောင်းမှု၊ ဆိုးမှု၊ တိုးတက်မှု၊ ဆုတ်ယုတ်မှု၊ အတိတ်၊ ပစ္စုပ္ပန်၊ အနာဂတ် စတဲ့အသံတွေကို နားစွင့်နေသင့်တယ်ကွ။ အဲ့ဒါကြောင့်မို့ ငါတော့ ငါ့ အလုပ်ဖြစ်တဲ့ ရထားတွေရဲ့အသံကို နားညည်းတယ်လို့ မထင်မိပေါင်ဗျား...။

       ပြီးတော့ ငါ့ဆီမှာမရပ်တဲ့ ရထားတွေနဲ့ပတ်သတ်ပြီးတော့လည်း ဘာမှမခံစားရပါဘူး။ သူ့ခရီးစဉ်မှာကိုက ငါ့နေရာမှာရပ်ဖို့ သတ်မှတ်ချက်မှ မပါခဲ့တာပဲ။ အဲ့ဒီအတွက် ငါကဘာ ကိုသွားပြီး ခံစားရမှာလဲ။ ကိုယ့်အလုပ် ကိုယ်မလုပ်ပဲ ကိုယ်နဲ့တကယ်မဆိုင်တဲ့ကိစ္စရပ် တွေမှာ လိုက်ပြီးခံစားနေရင် ဘယ်သူမှ ဘာမှဖြစ်လာမှာ မဟုတ်တော့ဘူးကွ”

        ဘူတာရုံလေး၏အသံအဆုံးတွင် ပတ်ဝန်းကျင်က ရုတ်တရက် တိတ်ဆိတ်သွားသလို ရှိ၏။ စဉ်းစားစရာအများကြီးနှင့်မို့ ကျွန်တော့်ရဲ့ရင်သည်လည်း ပြည့်အင့်သွားသလို ခံစားလိုက်ရသည်။ အတန်ကြာတော့မှ ဆိတ်ငြိမ်ခြင်းကို ထပ်မံဖြိုခွင်းသည်ဆိုရုံမျှသော လေသံသဲ့သဲ့ဖြင့် ဘူတာရုံလေးက ကျွန်တော့်ကိုပြော၏။

        “အသံတွေရဲ့အလယ်မှာ နေတတ်ထိုင်တတ်ဖို့ဆိုတာ အပြောမှာလွယ်ပေမယ့် လက် တွေ့မှာ ခက်ခဲရင် ခက်ခဲနေလိမ့်မယ်။ ဒါပေမယ့် ကြိုးစားရင်ဖြစ်နိုင်တဲ့ သူလိုငါလိုလူတွေ ထဲမှာ တကယ်လုပ်ရင် အဟုတ်ဖြစ်လာနိုင်တယ်ဆိုတာ... ရင့်ကျက်လာတဲ့တစ်နေ့ မင်းသိ လာပါလိမ့်မယ် ကောင်လေးရာ”...

         ကျွန်တော်ခေါင်းငြိမ့်ပြမိခဲ့သလား...။ ကိုယ့်ကိုကိုယ် မသေချာ။ နောက်... ဘူတာရုံ လေးကိုနှုတ်ဆက်ကာ ခြေလှမ်းများအား ကျွန်တော်တည်းသော အိမ်လေးရှိရာဆီသို့ ဦး တည့်ခဲ့လိုက်သည်။

~~~@~~~

ရထားသံလမ်းပေါ်မှဆင်းကာ ကားလမ်းမကြီးကိုဖြတ်ကူးပြီး အိမ်ရှေ့အရောက်တွင် နောက်ပြန်လှည့်ပြီး ဘူတာရုံလေးဆီသို့ လည်ပြန်ကြည့်မိ၏။ ထိုအခါ မှုန်မှိုင်းသော နှင်းမှုန် စ,များကြားတွင် ဘူတာရုံလေးက တိတ်ဆိတ်စွာဖြင့် ပြန်လည်ငိုက်မြည်းနေခဲ့တာကို တွေ့ လိုက်ရလေ၏။     ။

~~~@~~~

--------------------------------------------------------------------------------------------------------------

သက်တံဆယ်စင်းစာအုပ်လေးမှာ ရေးဖြစ်ခဲ့တဲ့ အက်ဆေးလေးပါ။ ခုမှ သတိရလို့ တင်လိုက်ခြင်းပါခင်ဗျာ...။

---------------------------------------------------------------------------------------------------------------

ချစ်ခြင်းအားဖြင့်...

~ဏီလင်းညို~
(အသံများနှင့်...) 

Year 2011. November.    

ကမ္ဘာတည်မယ့် ကဗျာ...

ရုတ်တရက် ရွာချလိုက်သောမိုးကြောင့် မြို့ထဲလမ်းမပေါ်မှလူတွေ ရုတ်ရုတ်သည်းသည်း ဖြစ်သွားကြရ၏။ ပလက်ဖောင်းပေါ်မှ ဈေးသည်များမှာ အမိုးအဖြစ်အသုံးပြုနိုင်သော ရောင်စုံထီးကြားကြီးများကို ဖွင့်သူဖွင့်၊ ရောင်းနေသောပစ္စည်းများအား ပလတ်စတစ်နှင့် အုပ်သူအုပ်ဖြင့် ကိုယ်စီအလုပ်ရှုပ်သွားကြ၏။

ပလက်ဖောင်းပေါ်တွင် လမ်းလျှောက်နေသူများမှာလည်း ထီးအဆင်သင့်ပါသူတွေက ထီးကိုထုတ်ပြီး ဖွင့်ဆောင်း ရ၊ ထီးမပါသောသူတွေက နီးစပ်ရာနေရာများရှိ မိုးခိုနိုင်သော နေရာများသို့ အပြေးအလွှားသွားကြရဖြင့် ခဏတွင်းချင်းမှာပင် ရှုပ်ယှက်ခတ်သွားကြလေတော့သည်။

“ဟား...ဟား၊ ဟေ့ကောင် ၀ဏ္ဏ... ဟိုမှာကြည့်လိုက်စမ်း”

 ရယ်သံတစ်ဝက်ဖြင့် သူ့အား လက်တို့ကာ ပြောလိုက်သော ထူးကျော်၏လေသံက အာလေးလျှာလေးသံ နည်းနည်းပေါက်နေခဲ့တာ အမှန်။ ထူးကျော်ညွှန်ပြရာဆီသို့ သူတို့ထိုင်နေခဲ့သော ဘီယာဆိုင်အတွင်းမှနေ အညို ရောင်မှန်ချပ်များကို ဖောက်ထွင်းကာ လှမ်းကြည့်လိုက်မိ၏။ မြင်လိုက်ရသော မြင်ကွင်းက တကယ့်ကို ရယ်ချင်စ ရာပင်။ ဦးလေးကြီးတစ်ယောက်မှာ ပလက်ဖောင်းပေါ်တွင်ရပ်ရင်း ထီးကို အသည်းအသန်ဖွင့်နေရှာသည်။ သို့ သော် ထီးဖွင့်လိုက်တိုင်း လေက တိုက်လိုက်၊ သူ့ထီးက လန်ထွက်သွားလိုက်နှင့် အခါခါ ဖြစ်နေရသည့်အထဲ ချိုင်း ကြားမှ သူ့ပိုက်ဆံအိတ်ကြီးအား ပြုတ်ကျသွားမှာ စိုးရိမ်စွာဖြင့် ခဏခဏ ပြန်ညှပ်နေခဲ့ရသေးလေတာ။ ဒီကြားထဲ လူတွေက သူ့ကို တိုးတိုးဝှေ့ဝှေ့ဖြင့် တွန်းတိုက်သွားကြတော့ သူ့ခမြာ လူတွေကြားထဲ ယိုင်ထိုးယိုင်ထိုး ဖြစ်နေရ ရှာသေး၏။

“ဟော...ဟော..ကြည့်၊ သူ့ထီးက လန်သွားပြန်ပြီ။ ဟား...ဟား”

ဘေးနားမှ ပြည့်စုံကပါ ရယ်သံစွက်လျှက် ခပ်ကြိတ်ကြိတ်ပြော၏။ ပြည့်စုံ၏အသံမှာ ထူးကျော်နည်းတူ အာလေး လျှာလေးဖြစ်နေခဲ့တာ သူသတိထားမိလိုက်၏။ ထိုအခါမှ သူ့ကိုယ်သူ အထိတ်တလန့် ပြန်တွေးမိလာသည်။ သူစကားပြောလိုက်ရင်လည်း ဒီကောင်တွေလို အာလေးလျှာလေးသံ ပေါက်နေလိမ့်မလားမသိ။ အတွေးနှင့်အတူ စောစောက မြင်ကွင်းအပေါ် ရယ်ချင်စိတ်တို့ အားလျှော့သွားသည်။

မလုံမလဲဖြင့် သူ့ကိုယ်သူအနံ့ခံကြည့်မိတော့ သောက်ထားသော ဘီယာတန်ခိုးများကြောင့် ချဉ်စုတ်စုတ်အနံ့ကို ခပ်သဲ့သဲ့ရ၏။ သို့သော်လည်း ဒါဟာ မှန်အလုံပိတ်ထားတဲ့ အဲကွန်းအခန်းထဲမှာမို့နေမှာပါဟု ရီဝေစွာတွေးရင်း စားပွဲပေါ်မှ လက်ကျန်ဘီယာခွက်ကို သူမော့သောက်ပစ်လိုက်သည်။

“ထပ်ချဦးမလား ၀ဏ္ဏ”

“သဘောပဲလေ”

ပြည့်စုံ၏အမေးကို ခပ်တည်တည်ဖြင့် ပြန်ဖြေရင်း ဆိုင်နံရံထက်မှ တိုင်ကပ်နာရီဆီ မသိမသာလှမ်းပြီး ခိုးကြည့်မိ ၏။ ညနေ ငါးနာရီ ထိုးခါနီးနေပြီ။ အိမ်ပြန်သင့်နေပြီဟု စိတ်ထဲတွေးမိသော်လည်း ဟန်ကိုယ့်ဖို့ဆိုသလို သူ ခပ်တည်တည် လုပ်နေမိတော့ ထူးကျော်က...

“ငါတော့ တော်ပြီကွာ။ ပြန်တော့မယ်။ ပြီးတော့ မိုးအေးအေးနဲ့ဆို ဘီယာသောက်ရတာ ဖီးလ်ကျဲတယ်။ ငါတို့ ဒီဆိုင်မှာ စ,သောက်တဲ့အချိန်တုန်းက မိုးမရွာလို့ ဘီယာကစ်လိုက်တာ”

“ဘာလဲ...၊ မင်းက ခု အပြင်းကစ်ချင်သေးလို့လား”

ပြည့်စုံ၏အသံက စိတ်ခေါ်သည့်အသံမျိုး။ ကြားထဲမှနေ အခြေအနေကို ငြိမ်ပြီး သူကြည့်နေလိုက်၏။ ထူးကျော်က မျက်နှာရှေ့တွင် လက်ဝါးတစ်ဖက်ကာပြကာ ခေါင်းကိုယမ်းရင်း ပြောသည်။

“ဟာ... ခု ဘယ်ကစ်လို့ဖြစ်တော့မလဲကွ၊ နှစ်ပင်လိမ်ပြီး ရွဲသွားမှာပေါ့။ ပြီးတော့ ခုပဲ အိမ်ပြန်ရတော့မယ့် ဟာကို။ ကျောင်းကပြန်လာတယ်လည်း ဆိုသေး၊ အရက်မူးပြီး ကွဲကွဲနဲ့ အိမ်ပြန်ရောက်သွားရင် ငါကွိုင်တက်လိမ့်မယ်”

“မင်းရော...၀ဏ္ဏ”

ပြည့်စုံက သူ့ဘက်လှည့်ပြီး မေးလာ၏။ ထို့ကြောင့် လက်ပိုက်ထားသော အနေအထားမှနေပြီး ပခုံးကိုစုံတွန့်ပြ လိုက်သည်။ ပြောရမယ်ဆို ကြားနေ၀ါဒအား သူကျင့်သုံးလိုက်ခြင်းသာ။ တကယ်တော့ ထူးကျော်နည်းတူ သူလည်း အိမ်ပြန်ချင်နေမိ၏။ အပြင်းလည်း မသောက်ချင်တော့။ သို့သော် ပြည့်စုံအား ထူးကျော်ပြောလိုက်သလို မျိုးတော့ ပွင့်ပွင့်လင်းလင်းကြီး သူမပြောချင်မိ။ တော်ကြာ သူ့အား အိမ်မပိုင်သူဟု ကျောင်းကဘော်ဒါတွေကြားမှာ ပြည့်စုံဆိုတဲ့ကောင် လျှောက်ဖွနေရင် မခက်ပါလား။

“မင်းလည်း မသောက်ပါနဲ့တော့ ၀ဏ္ဏရာ၊ ငါတို့ ပြန်ကြရအောင်။ ဒီနေ့တစ်နေ့လုံးလည်း ကျောင်းလစ်ပြီး ငါတို့ သွားချင်တဲ့နေရာတွေသွား၊ လုပ်ချင်တာတွေလည်း လုပ်ခဲ့ကြပြီးပြီပဲကွာ”

ထူးကျော်က အားမလိုအားမရဟန်ဖြင့် သူ့ကိုကြည့်ရင်း ခပ်ညည်းညည်း လေသံဖြင့် ပြောလာ၏။ ထူးကျော် စကားက ဟုတ်တော့လည်း ဟုတ်ပါသည်။ ဒီနေ့ သူတို့သုံးယောက် လှိုင်သာယာဘက်မှ ရန်ကုန်အနောက်ပိုင်း နည်းပညာတက္ကသိုလ်ဟု အမည်တွင်သည့် မိခင်ကျောင်းတော်ကြီးဆီသို့ မရောက်ဖြစ်ခဲ့ကြ။ ကျောင်းလစ်ပြီး သူ တို့သင်ရသော ဒုတိယနှစ် Civil သင်ခန်းစာများအစား  မြေနီကုန်းဒဂုံစင်တာမှ ကားအသစ်တင်သော သရီးဒီရုပ် ရှင်ရုံတွင် အရင်ဆုံး ရုပ်ရှင်ဝင်ကြည့်ဖြစ်ကြ၏။ နောက် ကွန်ပျူတာဂိမ်းဆော့နိုင်သည့် အင်တာနက်ဆိုင် တစ်ဆိုင်၊ ထိုမှတစ်ဆင့် နောက်ဆုံးပိတ် အခု မဟာဗန္ဓုလလမ်းပေါ်မှ ဘီယာဆိုင်သို့ ရောက်နေခဲ့လေတော့တာ။

သို့သော် သူကတော့ ထူးကျော်၏စကားအား ဘာသိဘာသာ ပုံစံမျိုးဖြင့် နေလိုက်မိသည်။ အေးရာအေးကြောင်း ပုံစံကို မသိမသာဖမ်းရင်း ပြည့်စုံထံမှ ဘာသံထွက်လာမလဲဟု ခိုးကြောင်ခိုးဝှက် နားစွင့်နေမိ၏။

“ဒါဆိုလည်း လိမ့်ကြတာပေါ့ကွာ။ ဒါပေမယ့် အပြင်မှာ မိုးသည်းနေတယ်”

ပြည့်စုံ၏အသံက ထူးကျော်၏စကားများအပေါ် တစ်ခုခုကို သဘောပေါက်သွားသည့် အသံမျိုး။ ဘာပဲဖြစ်ဖြစ် မကြာခင်ပြန်ဖြစ်တော့မှာ သေချာသွားတာမို့ သူ့ရင်ထဲတွင် တိတ်တဆိတ် ၀မ်းသာသွားမိရ၏။ ထူးကျော်က အားတက်သရော လေသံဖြင့်...

“မိုးသည်းတာ ဘာဖြစ်သလဲကွာ။ ငါတို့ ဒီကထွက်ရင် တက္ကစီ ငှားစီးသွားကြမှာပဲဟာ။ ဟုတ်တယ်မို့လား ၀ဏ္ဏ”

ဒီတစ်ခါတော့ ထူးကျော်၏စကားအား သူခပ်သွက်သွက် ခေါင်းငြိမ့်ပြလိုက်မိပါသည်။

သူတို့သုံးယောက် ကျသင့်ငွေအား အချိုးကျစီရှင်းပြီး ဘီယာဆိုင်ထဲမှနေထွက်ခဲ့တော့ အပြင်ဘက်တွင် မိုးက သည်းထန်လွန်းနေခဲ့ပါသည်။ သူနှင့် ပြည့်စုံတို့ထံတွင် ထီးမပါခဲ့။ ထို့ကြောင့် ထူးကျော်၏ ထီးကောက်ရှည်ကြီး အောက်တွင် သုံးယောက်သား ပူးပူးကပ်ကပ်ဆောင်းကာ ပလက်ဖောင်းပေါ် ပြိုင်တူခြေချမိကြသည်။ သူတို့ခြေ ထောက်များပေါ်သို့ မိုးရေစက်များက အလုအယက် လာရောက်ထိမှန်ကြလေတော့ ပြည့်စုံက စိတ်ပျက်သံနှင့်...

“စိုကုန်ပြီကွာ”

“ဘာဖြစ်လဲကွာ။ တက္ကစီပေါ်ရောက်မှ ငါတို့ကျောပိုးအိတ်တွေထဲက ကျောင်းယူနီဖောင်းတွေနဲ့ ပြန်လဲလိုက် ရင် ရတာပဲဟာ”

 ထူးကျော်၏စကားကို သူ့စိတ်ထဲမှနေ တိတ်တဆိတ် ထောက်ခံမိလိုက်၏။ ဟုတ်သည်လေ။ သူတို့ကျောပိုးအိတ် တွေထဲမှာ အပေါ်ဖြူ၊ အောက်အပြာ ကျောင်းယူနီဖောင်းတွေ ရှိနေခဲ့တာပဲ။ ဒဂုံစင်တာမှ ရုပ်ရှင်ရုံရဲ့အိမ်သာထဲမှာ အိမ်ကယူလာတဲ့ အပြင်အ၀တ်အစားတွေနဲ့လဲဝတ်ကြပြီး GTC ကျောင်းသားတွေမှန်းမသိအောင် အပြင်မှာ လျှောက်လည်ခဲ့ကြပေမယ့် အိမ်ပြန်ရင် ဒီအ၀တ်အစားတွေနဲ့မှ ပြန်လို့မရတဲ့ဟာ။ ထူးကျော်ပြောသလို တက္ကစီထဲ မှာ ခပ်တည်တည်နဲ့ ပြန်လဲဝတ်ရမှာပါပဲ။ နောက်တစ်ခါ ပြန်တွေ့ဖို့မလွယ်လှသော၊ ပြန်တွေ့ရင်လည်း ဂရုစိုက်စရာ မလိုသော တက္ကစီဒရိုင်ဘာအား သူတို့အနေဖြင့် ဘာမှ ရွံ့ကြောက်နေစရာ အကြောင်းမရှိ။

သုံးယောက်သား ထီးတစ်ချောင်းအရိပ်ကိုခိုရင်း ပလက်ဖောင်းအစပ်တွင် ရပ်လိုက်မိကြ၏။ သူတို့ကျောဘက်မှ ပလက်ဖောင်းပေါ်မှာတော့ မိုးသည်းသည်း ညနေခင်းထဲတွင် လူတွေက ရှုပ်ထွေးနေကြဆဲ။ အချိန်တန် အိမ်ပြန်မရောက်မှာ စိုးရိမ်နေပုံရသော ထူးကျော်က အလယ်မှနေပြီး လာသမျှ တက္ကစီများအား လက်လှမ်းတား နေလေ၏။ သို့သော် အချို့တက္ကစီများက ရပ်မပေးကြပဲ ဆက်မောင်းသွားကြ၏။ ခရီးသည်ပါနေလို့လား ဘာလား တော့ သူမသိ။ မိုးရေစက်များကြောင့် ကားအတွင်းပိုင်းတွေကို သူတို့ကောင်းစွာ မမြင်နိုင်သောကြောင့်ပင်။

ဒါကို ထူးကျော်က အားမလျှော့၊ ဆက်တား၏။ ထိုစဉ် လွယ်ထားသော သူ့ကျောပိုးအိတ်ကြိုးက ပခုံးပေါ်မှ လျှောကျချင်လာတာမို့ တစ်ဖက်လှည့်ကာ ပြန်တင်မိနေဆဲ...

“ဟော... ကားရပြီ။ လာကြ ဟေ့ကောင်တွေ”

ထူးကျော်က မိုးသံလေသံကိုကျော်အောင် ၀မ်းသာအားရပြောရင်း သူတို့အနားမှာ ရပ်လာသော တက္ကစီ တစ်စီး နားသို့ တိုးသွားလေ၏။ အိတ်ကို သေချာပြင်လွယ်ရင်း မိုးစက်များလွတ်အောင် ထီးအောက်လိုက်ခိုကာ အနားမှ တက္ကစီကို ကြည့်မိလိုက်တော့ သူ့ရင်ထဲ ထိတ်ခ,နဲ ဖြစ်သွားရ၏။ ထိုစဉ်...ဒရိုင်ဘာဘေးမှ ပိတ်ထားသော ကားပြတင်းမှန်လေးက လျှောကျလာခဲ့သည်။

ကားမှန်ချပ်၏အနောက်မှ အနှေးပြကွက်တစ်ခုလို ဖြည်းဖြည်းချင်းပေါ်လာသော မျက်နှာတစ်ခုအား သူမြင် လိုက်ရချိန်တွင်တော့ စောစောက ထိတ်ခ,နဲခုန်မိသော သူ့ရင်သည် ဒိုင်းခ,နဲ ပွင့်ထွက်သွားရသလိုပင်။

“ဖေကြီး”

သို့သော် ထိုအသံသည် သူ့နှုတ်မှ ထွက်ပေါ်လာခြင်းမဟုတ်။ ရင်တွင်းမှာသာ ကြောက်လန့်တကြားဖြင့် ရေရွတ် မြည်တမ်းလိုက်မိခြင်းသာ။

ဖေကြီးက ကားထဲမှနေပြီး သူ့အား ခပ်စူးစူးတစ်ချက်လှမ်းကြည့်၏။ နောက်... ထူးကျော်ဘက်လှည့်ကာ...

“သားတို့ ဘယ်သွားမှာလဲ”

“ကျွန်တော်က ကျောက်မြောင်း သီတာမှတ်တိုင်မှာဆင်းမယ်။ ပြီးရင် သူက တာမွေ ဦးချစ်မောင်လမ်းမပေါ် မှာ ဆင်းမယ်။ သူကတော့ တောင်ဥက္ကလာက ဝေဇယန္တာလမ်းဘက်”

“ဒါဆို အန်ကယ်လ့်ကို သုံးထောင့်ငါးရာပဲပေးပါ”

“သုံးထောင်ထားပါလား အန်ကယ်လ်ရာ”

ထူးကျော်က ဈေးဆစ်၏။

“မရလို့ပါကွယ်။ အန်ကယ်လ်တောင်းတာ ဈေးအမှန်ပါပဲ”

ထူးကျော်နှင့် အချီအချပြောနေရင်း ဖေကြီးက ခပ်စိမ်းစိမ်းမျက်ဝန်းများဖြင့် မျက်မှန်အောက်မှနေပြီး သူ့ကို ဝေ့ခနဲ တစ်ချက်ကြည့်ပြန်၏။ ဒီအကြည့်မျိုးကို သူကောင်းကောင်းသိသည်။ တစ်ခါတစ်ရံ သူ့ကို ဒေါသထွက်လွန်း လျှင်ဖေကြီးက ထိုကဲ့သို့ ကြည့်တတ်ခြင်းကြောင့်ပင်။ ဖေကြီးအကြည့်က လျှပ်တစ်ပြတ်လေးသာမို့ သူ့သူငယ်ချင်း တွေ ရိပ်မိနိုင်စရာ အကြောင်းတော့မရှိ။ သို့သော် သူ့ကျောရိုးတစ်လျှောက်မှာတော့ စိမ့်ခ,နဲ ဖြစ်သွားရလေ၏။

“ကဲ...သွားမယ်ကွာ။ ငါးရာနဲ့ ဆစ်မနေပါနဲ့တော့၊ ငါတို့အားလုံးက ရုပ်ရှိ ရေလျှံတွေပဲဟာ။ မင်းဈေးဆစ်နေတာနဲ့ ဒီမှာ စိုရွဲကုန်ပြီ”

ပြည့်စုံက ထူးကျော်အား ရယ်သံတစ်ဝက်ဖြင့် ပြောရင်း ပလက်ဖောင်းနှင့်ကပ်လျှက် နောက်ခန်းကားတံခါးကို ဆွဲ ဖွင့်ကာ ကားပေါ်သို့အရင်ဆုံးတက်လေ၏။ နောက်... ပြည့်စုံဘေးတွင် သူဝင်ထိုင်လိုက်ပြီးတော့ ထူးကျော် က နောက်ဆုံးမှ ထီးကိုပိတ်ကာ သူ့ဘေးမှာ ၀င်ထိုင်လာသည်။ ထူးကျော်ဘက်မှ ကားတံခါးပိတ်လိုက်သည်နှင့် တစ်ပြိုင်နက် ဖေကြီးမောင်းသော တက္ကစီကားလေး၏ဘီးများက လမ်းမပေါ်တွင် စတင်ရွေ့လျားလေတော့သည်။

 ကားဘီးများ စ,တင်ရွေ့လျားတာနှင့် ထူးကျော်တို့က အင်္ကျီလဲဖို့ပြင်ကြ၏။ သူကတော့ မလှုပ်မိ။ ဟုတ်သည်လေ၊ တစ်နေ့လုံး သူငယ်ချင်းများနှင့်အတူ ကျောင်းပြေးကာ လျှောက်လည်၊ သောက်စားပြီးကာမှ အိမ်ပြန်ဖို့အတွက် ဖေကြီးမောင်းသော တက္ကစီကားကို တိုက်တိုက်ဆိုင်ဆိုင် ငှားစီးမိလျှက်သား ဖြစ်သွားရပြီးတဲ့နောက်မှာ အ၀တ်လဲနေလို့ရော သူ့အတွက် ဘာထူးလာတော့မှာလဲ။

“ဟေ့ကောင်...၀ဏ္ဏ၊ မင်းကမလဲဘူးလား”

 ကျောင်းယူနီဖောင်းကို ကြယ်သီးတပ်ရင်း ထူးကျော်က ပခုံးချင်းတိုက်ကာ သူ့ကိုမေးလာ၏။ သူခေါင်းခါရင်း ကားမောင်းနေသော ဖေကြီးအား တစ်ချက်ခိုးကြည့်လိုက်မိသည်။ ထိုအခါ ကားထဲမှ နောက်ကြည့်မှန်လေးထဲမှာ ဖေကြီးနှင့်သူ အကြည့်ချင်း သွားဆုံကြ၏။ စူးရှရှမျက်ဝန်းများဖြင့် ကြည့်လိုက်သော ဖေကြီးအကြည့်ကို သူရင်မ ဆိုင်ရဲတာမို့ ခေါင်းငုံ့လိုက်မိပါသည်။ သို့သော် တော်သေးသည်ဟု ဆိုရမည်။ သူငယ်ချင်းများရှေ့မှာ သူ့အား သိ က္ခာကျအောင် ခုထိ ဖေကြီးက ဘာဆိုဘာမှ မပြောသေး၊ မလုပ်သေးပါ။ ပြောရမည်ဆိုလျှင် ဖေကြီးလုပ်နေပုံက သူ့နှင့် သူစိမ်းတွေလိုမျိုး။ သူကလည်း ခုထိ ဖေကြီးကို မခေါ်ရဲသေး။

“ဒီကောင်က အိမ်ပိုင်ပါတယ် ထူးကျော်ရာ၊ မင်းလိုမဟုတ်ဘူး”

ပြည့်စုံ၏အသံက မသိသားဆိုးဝါးစွာ ထွက်လာပြန်၏။ မှန်အလုံပိတ်ကားအတွင်းမှာ အဲကွန်းဖွင့်ထားသော် လည်း သူ့တစ်ကိုယ်လုံး ပူလောင်လာသလို ဖြစ်လာပြီး ထိုင်နေရာမှပင် အငွေ့ပျံထွက် ပျောက်ကွယ် သွားချင်မိ လာရ သည်။ ဒီကောင်တွေ ဘာမှမသိပဲ စွတ်ပြောနေကြသော စကားလုံးများကြောင့် ကြာရင်ခက်တော့မည်။ သို့သော် သူမတားဆီးနိုင်ခဲ့။ ဟုတ်သည်၊ သူတို့သူငယ်ချင်းသုံးယောက်က တက္ကသိုလ်ရောက်မှ ခင်ကြသူများမို့ တစ် ယောက်အိမ်လည်း တစ်ယောက် မရောက်ဖူး၊ သူ့အဖေဘာလုပ်တယ်၊ ကိုယ့်အဖေဘာလုပ်တယ် ဆိုတာကိုလည်း ဆွေးဆွေးနွေးနွေး မပြောဖူးခဲ့ကြ။ နေတာလည်း တစ်နေရာစီမို့ ကျောင်းမှာသာ တွေ့ဖြစ်ခဲ့ကြတာ။ တွေ့တာနှင့် စာ အကြောင်းပြောဖို့၊ နောက်ဖို့ ပြောင်ဖို့၊ စိတ်ဝင်စားနေကြသော ကောင်မလေးတွေအကြောင်း ပြောကြဖို့၊ ကျောင်း မှာ ဆရာတွေမသိအောင် ဖဲခိုးရိုက်ကြဖို့၊ ကျောင်းတက်ရတာညစ်လာလျှင် ခုလိုမျိုး တစ်ခါတစ်လေ ကျောင်းပြေး ဖို့၊ ဘီယာသောက်ဖို့လောက်ပဲ အာရုံထားခဲ့ကြတာ။ ထို့အတွက် အခု ကားမောင်နေသော တက္ကစီဒရိုင်ဘာကြီးက သူ့အဖေဖြစ်နေမှန်းမသိလို့ ဒီကောင်တွေ လျှောက်ပြောနေကြတာ သူတို့အပြစ်မှ မဟုတ်ခဲ့တာပဲ။

ဒါဆို သူကရော ခုထိ သူငယ်ချင်းတွေရှေ့မှာ ဖေကြီးကို ဘာဖြစ်လို့ မခေါ်ဖြစ်သေးတာပါလိမ့်။ ဖေကြီးက တက္ကစီ ဒရိုင်ဘာတစ်ယောက်မို့ သူငယ်ချင်းတွေရှေ့မှာ ခေါ်ဖို့ ရှက်နေမိလို့လား။ ဟင့်အင်း.. အဲ့ဒီလိုတော့ မဟုတ်ရ၊ လုံးဝ မဟုတ်ရပါ။ သူငယ်ချင်းတွေရှေ့မှာ သူ့အား ဖေကြီး တစ်ခုခုလုပ်လိုက်မှာကို ရှက်ကြောက်စိုးရွံ့နေမိခြင်းသာ ဖြစ်ပါသည်။

ကားလေးကတော့ လမ်းမပေါ်တွင် တရိပ်ရိပ် ပြေးလွှားနေဆဲ။ ထို့အတူ သူ့စိတ်တို့ကလည်း စုစည်းလို့ မရနိုင် လောက်အောင် ဟိုဟို ဒီဒီ လွင့်ပျံ့ကာ ပူလောင်ကျွမ်းလျှက် ရှိနေခဲ့ရ၏။ အိမ်ပြန်ရောက်လျှင် ဖေကြီးကို သူ ဘယ်လို အကြောင်းပြလို့ ရနိုင်မလဲ၊ ရှင်းပြလို့ ရနိုင်မလဲ။

“ဟေ့ကောင် ၀ဏ္ဏ၊ တိတ်လှချေလားကွ။ မင်း တော်တော်မူးနေပြီနဲ့တူတယ်”

ပြည့်စုံအသံက အာလေးလျှာလေးဖြင့် အကျယ်ကြီး ထွက်လာပြန်သည်။ ခေါင်းပေါ်မှ ဆံပင်တွေ ထောင်သွား မတတ် စိုးရွံ့သွားမိသော်လည်း ဘာမှမဖြစ်ဟန်ဆောင်ကာ ပြည့်စုံအား ခေါင်းခါပြလိုက်မိ၏။ တစ်ဆက် တည်းလိုလို ကားမောင်းနေသော ဖေကြီးအား စိတ်မလုံစွာဖြင့် မသိမသာလှမ်းကြည့်မိတော့ ကားတွင်းရှိ နောက် ကြည့်မှန်လေးထဲမှာ ဖေကြီးနှင့်သူတို့ အကြည့်ချင်း ဆုံမိသွားကြပြန်သည်။ မျက်မှန်အောက်မှ ဖေကြီး၏မျက်ဝန်း များက စိမ်းဖန့်ဖန့်အရောင်တွေ ဖျာထွက်နေသည်ဟုပင် သူ့စိတ်ထဲ တွေးထင်လိုက်မိ၏။ သူ အာခေါင်တွေခြောက် ကာ ခေါင်းထဲမှ ရီဝေေ၀ခံစားချက်များပင် ကြက်ပျောက် ငှက်ပျောက် ဖြစ်ချင်သွားရပြန်သည်။ ရင်ထဲမှာလည်း စိုး ရွံ့စိတ်၏လှုံ့ ဆော်မှုဖြင့် တထိတ်ထိတ် အခုန်မြန်လာ၏။ ဘာမှမသိပဲ ပြည့်စုံတို့ လျှောက်ပြောနေတာနှင့် ကြာရင် ခက်ရတော့မည်။ ထို့ကြောင့် ကားပေါ်မှ ဒီကောင်တွေ မြန်မြန်ဆင်းသွားကြပါစေတော့ဟုသာ စိတ်ထဲမှနေ ကြိတ် ကာ ဆုတောင်းနေမိလိုက်သည်။

သူတို့ခရီးစဉ်အတိုင်း ကျောက်မြောင်း သီတာမှတ်တိုင်အနီးရောက်တော့ ထူးကျော်က အရင်ဆင်းသွား၏။ နောက်... တာမွေမှ ဦးချစ်မောင်လမ်းမတစ်နေရာအရောက်တွင် ပြည့်စုံက သူ့အားနှုတ်ဆက်လျှက် ဆင်းသွားပြန် လေသည်။ ပြည့်စုံ ဆင်းသွားပြီးပြီးချင်း ကားထဲတွင် ဖေကြီး၏ တောက်ခေါက်လိုက်သံက နင့်နင့်သည်းသည်းနိုင် လွန်းလှစွာ ထွက်ပေါ်လာခဲ့၏။ တစ်ကိုယ်လုံးကိုကျုံ့ကာ ယောင်ယမ်းပြီး သူအသက်အောင့်ထားလိုက်မိစဉ် ကား လေးက စောစောကထက်ပိုပြီး အရှိန်ပြင်းစွာ မောင်းထွက်လိုက်ခြင်းအား ခံစားမိလိုက်သည်။ ခုမှ ကူရာ ကယ်ရာ မဲ့သလိုမျိုးလည်း ဖြစ်လာရ၏။ ကားအပြင်ဘက်တွင်တော့ မိုးစက်များက သည်းထန်စွာဖြင့် ရွာသွန်းကျနေဆဲ။

~~~@~~~

ဖွင့်ဟထားသော ပြတင်းပေါက်ဆီမှ တိုးဝင်လာသော မိုးသက်လေက သူ့အား မအေးမြစေနိုင်ခဲ့ပါ။ သူ့ရင်ထဲတွင် မခံချင်စိတ်၊ နာကျင်စိတ်၊ ဒေါသဖြစ်စိတ်တို့ဖြင့် ပူလောင်လွန်းနေခဲ့ရ၏။ အိမ်အပြင်ဘက်ဆီမှ ရွာသွန်းနေ ဆဲဖြစ်သော မိုးရေစက်များ၏ ခပ်ကြမ်းကြမ်း မြည်တမ်းသံတို့က ထိုခံစားမှုအား ပိုမိုအားကောင်းအောင် လှုံ့ဆော် ပေးနေခဲ့ကြသလိုလို။

“မင်းဟာ.. လူဖြစ်မယ့်ကောင်မဟုတ်ဘူး။ အသက်နှစ်ဆယ်မပြည့်သေးဘူး၊ ကျောင်းခန်းထဲမှာ ရှိနေရမယ့် အချိန်မှာ လမ်းပေါ်ရောက်နေပြီး ဘီယာလေးတမြမြနဲ့။ ဘာလဲ၊ မင်းက မင်းကိုယ်မင်း သိပ်ဟုတ်နေပြီလို့ ထင်နေ တာလား။ အဲ့ဒါဆိုရင်တော့ ဆောရီးပဲ ၀ဏ္ဏ။ ငါအဲ့ဒီလိုမျိုးကောင်မျိုးကို သားမတော်ချင်ဘူး။ သိပ်ရှက်ဖို့ ကောင်း လွန်းလို့ပဲ။ အဲ့ဒီတော့ ဒီလိုပုံမျိုး မင်းဆက်လုပ်နေမယ်ဆိုရင် အဆိပ်ပင်ကိုတော့ ငါရေမလောင်းနိုင်ဘူး။ ကဲ... မင်း ဘာဆက်လုပ်မှာလဲ။ မင်းလမ်းကို မင်းဘာသာမင်း သေချာရွေးတော့ ၀ဏ္ဏ”

 ဖေကြီးကတော့ တစ်လမ်းလုံး ထိန်းချုပ်ထားရသမျှတို့အား သူ့အပေါ် စိတ်ရှိသမျှပေါက်ကွဲပြီးနောက် ညမမှောင်မီ ကားပြန်အပ်ဖို့ရာ အုံနာအိမ်ရှိရာဆီသို့ ပြန်ထွက်သွားခဲ့ပြီ။ သို့သော် ဖေကြီးပြောသွားခဲ့သော ဒေါသရောင် လွှမ်းသည့် စကားသံများက ခုထိ သူ့နားထဲမှ ထွက်မသွားကြသေး။ ညနေတုန်းက သားအဖနှစ်ယောက် အိမ်ပြန် ရောက်ရောက်ချင်း သူ့အား ဖေကြီးထိုးခဲ့သော လက်သီးချက်များထက် ထိုစကားများက သူ့ရင်ကို ပိုမိုနာကျင်စေ နိုင်လွန်းလှပါသည်။

တကယ်ဆို သူ့ကို ဖေကြီး ဒီလိုမပြောသင့်ပါ။ သူကျောင်းပြေးခြင်း၊ ဘီယာသောက်ခြင်းတို့က တစ်ခါတစ် လေမှသာ ဖြစ်ပါသည်။ ကျောင်းသားသဘာဝ ပျော်ရွှင်ပေါ့ပါးစွာ နေတတ်ခဲ့သော်လည်း ကျောင်းမှ ရွယ်တူသူငယ် ချင်းတချို့လို မူးယစ်ဆေးဝါး ဘာညာ၊ သူမသုံးဖြစ်။ ကျောင်းသူလှလှလေးများနှင့်လည်း ပွေပွေရှုပ်ရှုပ် မနေမိ။ ဆ ရာများမသိအောင် တစ်ခါတစ်ရံ ဖဲခိုးရိုက်တတ်သော်လည်း အပျော်သဘောမှလွဲပြီး လောင်းကစားအား ခုံမင်နှစ် သက်ခြင်းတို့ မဖြစ်မိတာက အမှန်။ ထို့ပြင် ဒီနှစ်က ဒုတိယနှစ်မို့ B. Tech ၀င်နိုင်ဖို့ သူကြိတ်ကြိုးစားနေခဲ့မိသေး တာ။ သားအဖနှစ်ယောက်တည်းသာရှိသော သူနှင့်ဖေကြီးတို့ဘ၀အတွက် သူဘက်ကလည်းတတ်နိုင်သလောက် ကြိုးစားနေမိခဲ့လေတာ။

ဒါတွေကို ဖေကြီးက မသိပဲနှင့် သူ့အား စွပ်စွဲပြောရက်သည်။ ‘လူဖြစ်မယ့်ကောင် မဟုတ်ဘူး’၊ ‘အဆိပ်ပင် ရေမလောင်းနိုင်ဘူး’ဆိုသော စကားတွေကို သူမခံချင်မိ။ သူ့မာနတို့အား နှိုးဆွနေခဲ့သလို ခံစားရမိ၏။ သူ့အား ဖေ ကြီး အထင်သေး၊ ရှုပ်ချလွန်းသည်ဟူသော အတွေးတို့က သွေးကြောတစ်လျှောက် မွှေနှောက်စီးဆင်းနေခဲ့ကြ သည် ထင်ရ၏။

ရေမြှုပ်မွေ့ယာ ခပ်ထူထူခင်းထားသော ကုတင်ပေါ်တွင် ထိုင်နေရာမှ သူအောက်သို့ ဆင်းလိုက်၏။ ထိုအခါ မျက်နှာချင်းဆိုင်ရှိ နံရံထက်တွင် ချိတ်ဆွဲထားသော ကိုယ်တစ်ပိုင်းပေါ်မှန်ထဲမှ သူ့မျက်နှာအား မျက်နှာကျက်ဆီမှ ဖျာကျနေခဲ့သည့် မီးချောင်းအလင်းရောင်အောက်တွင် ရှင်းရှင်းလင်းလင်း တွေ့လိုက်ရ၏။ သြော် ဖေကြီးရဲ့ ဒေါသ လက်သီးတွေထဲမှတစ်လုံးက သူ့ဘယ်ဘက်မေးရိုးတစ်ဝိုက်ကို အနည်းငယ်ညိုမည်း၊ ယောင်ကိုင်းနေစေခဲ့ပါလား။

သူ မဲ့ပြုံးတစ်ချက်ကို ပြုံးလိုက်မိသည်။ ဘယ်ဘက်မေးရိုးနေရာက အောင့်ခ,နဲခံစားရ၏။ အဓိပ္ပါယ်မဲ့စွာခေါင်းခါရင်း သူထပ်ပြုံးမိလိုက်ပြန်သည်။ နောက်... သူ့ဗီရိုလေးထဲမှ ခရီးဆောင်ကျောပိုးအိတ်နှင့် အ၀တ်အစားတချို့ကို ထုတ်ယူကာ ကုတင်ပေါ်သို့ ပစ်တင်လိုက်၏။ ထိုစဉ် လက်မှာပတ်ထားသော Casio တံဆိပ် ဓာတ်ခဲနာရီ အမည်းရောင်လေးက တစ်နာရီ တစ်ခါမြည်သည့် အလေ့အထအတိုင်း တီ,ခနဲ တစ်ချက်ထ,မြည်လာသည်။ နာရီ ကိုကြည့်လိုက်မိတော့ ညခုနစ်နာရီ။

အ၀တ်များကို ကျောပိုးအိတ်ထဲသို့ ခပ်သွက်သွက်လေး သူထည့်လိုက်၏။ ခုနေ မြန်မြန်လုပ်ရမည်။ မလုပ်လို့မဖြစ်၊ ညခုနစ်နာရီဆိုတာ ခါတိုင်း ဖေကြီးကားအပ်ပြီး အိမ်ပြန်ရောက်နေကျအချိန်။ ထို့ကြောင့် အခုလောလော ဆယ် ဖေကြီးပြန်မလာသေးခင် ဒီအိမ်ပေါ်ကနေ သူအမြန်ဆုံး ဆင်းရမည်။ ‘လူဖြစ်မယ့်ကောင် မဟုတ်ဘူး’ဆို သော ဖေကြီး၏ စကားမှားကြောင်း ကိုယ့်နည်းကိုယ့်ဟန်ဖြင့် သူသက်သေပြချင်မိနေ၏။

ဒီညတော့ ပြည့်စုံအိမ်မှာဖြစ်ဖြစ်၊ ထူးကျော်အိမ်မှာဖြစ်ဖြစ် သူအိပ်မည်။ နောက်ရက်များတွင် သူအလုပ်ရှာပြီး ရရာအလုပ် ၀င်လုပ်မည်။ နောက်... ကိုယ့်ဘာသာကိုယ် အဆောင်ငှားနေပြီးနေမည်။ ကျောင်းတော့ ခဏနား ထားရမည် ထင်၏။ သို့သော် ကိစ္စမရှိ၊ အပြင်မှာ အလုပ်လုပ်ကာ ပိုက်ဆံစုမိပြီးနောက် သူကျောင်းပြန်တက်မည်။ လူတစ်လုံး သူတစ်လုံးဖြစ်ကာ ဘွဲ့ရပြီးတော့မှ ခေါင်းမော့ ရင်ကော့ပြီး ဖေကြီးဆီသို့ သူပြန်လာမည်။

စိတ်ကူးထဲမှ အစီအစဉ်အား ကိုယ့်ဘာသာကိုယ် ကျေနပ်သွားရ၏။ မှတ်ပုံတင်၊ ကျောင်းသားကဒ်၊ လက်ကိုင်ဖုန်း၊ လက်ပ်တော့ကွန်ပျူတာလေးနှင့် ပိုက်ဆံအိတ်တို့ကို ယူလိုက်သည်။ မမေ့မလျှော့ ပိုက်ဆံအိတ်ကို ဖွင့်ကြည့်လိုက် မိတော့ သူ့စိတ်ထဲမှာ နည်းနည်းအားလျှော့သွားမိ၏။ အိတ်ထဲမှာ သူပိုင်သောပိုက်ဆံက ငါးထောင်ပင် မပြည့်ချင် တော့။ ပြီးတော့ ခုထိ ညစာလည်း မစားရသေး။

အိပ်ယာပေါ်တွင် ပြန်ထိုင်ချလိုက်ပြီး သူခဏ ငိုင်သွားမိသည်။ နောက်... ခေါင်းထဲသို့ အကြံတစ်ခု ဖျတ်ခနဲ ၀င်လာမိတော့ အိပ်ယာထက်မှနေ ချက်ချင်းပြန်ထ,လိုက်၏။ ဟုတ်သည်၊ ဖေကြီးအခန်းထဲမှ ဗီရိုထဲမှာ ပိုက်ဆံတ ချို့ သိမ်းထားနိုင်သည်။ ထိုအထဲမှ သုံးဖို့စွဲဖို့ နည်းနည်းယူသွားရမည်။ တစ်ခါမှတော့ ဖေကြီးမသိအောင် သူမယူခဲ့ ဖူး။ သို့သော် ဒီတစ်ခါယူခြင်းက ဖေကြီးထံမှနေ နောက်ဆုံးအနေဖြင့်ယူခြင်းမို့ သူ့လုပ်ရပ်က မှန်သည်ဟု ကိုယ့်ဖာ့ သာပြန်ပြီး အားပေးမိသည်။

ကျောပိုးအိတ်ကိုလွယ်ကာ သူ့အခန်း၏ခေါင်းရင်းဘက်ရှိ ဖေကြီးအိပ်ခန်းဘက်သို့ ထွက်ခဲ့လိုက်သည်။ တံခါးမရှိသော ၀င်ပေါက်နားမှ လိုက်ကာလေးကိုမ,ကာ မီးခလုတ်လေးကိုစမ်းပြီး ဖွင့်လိုက်မိ၏။ လင်းသွားသော နှစ် ပေ မီးချောင်းရောင်အောက်တွင် ဖေကြီး၏ ရှစ်ပေပတ်လည်လောက်သာကျယ်ဝန်းသော အိပ်အခန်းလေးက ငြိမ် သက်စွာ တိတ်ဆိတ်လျှက်။

အခန်းလေးထဲသို့ သူလှမ်းဝင်လိုက်၏။ ဆုံးဖြတ်ပြီးသားအတိုင်း အခန်းထောင့်မှ စေ့ရုံသာစေ့ထားသော ဖေကြီး၏ ဗီရိုလေးကို သူဖွင့်လိုက်သည်။ ပထမအထပ်မှ အနည်းငယ်သာရှိသော ရှပ်အင်္ကျီအထပ်များ၊ ပုဆိုးအထပ် များ၏ကြားတွင် သိမ်းထားနိုင်သော ပိုက်ဆံတချို့ ရှိနိုးနိုးဖြင့် သူရှာမိသော်လည်း မတွေ့ရ။ ထို့ကြောင့် ဒုတိယ ထပ်တွင်ရှိသော စာရွက်စာတမ်းများ၊ ဖိုင်များကြားတွင် ရှာမိပြန်သည်။ ပိုက်ဆံနှင့်တူတာ အစ၊ အနမျှပင် မတွေ့ရ ပြန်။

သူစိတ်မလျှော့ပဲ အောက်ဆုံးထပ်ဖြစ်သော တတိယမြောက်အထပ်ဆီသို့ မျက်စိရောက်သွားမိ၏။ သို့သော် ထိုအထပ်တွင် ခပ်လတ်လတ်အရွယ်အစားရှိသော ကပ်ထူစက္ကူတစ်ဘူးနှင့် စာအုပ်ဟောင်းတချို့တို့မှလွဲပြီး ကျန် တာ ဘာမှမရှိ။ အိတ်ကိုဘေးချကာ ကြမ်းပြင်ပေါ်တွင် ထိုင်ချလိုက်ပြီး စက္ကူဘူးကို သူအပြင်ထုတ်လိုက်သည်။ နောက်... ဖွင့်ကြည့်မိတော့ ထိုအထဲတွင် ဘာမှ ထွေထွေထူးထူးမရှိ။ နာရီအဟောင်းများ၊ တိုလီမိုလီများ၊ စာအုပ် ဟောင်းများနှင့်အတူ ပလတ်စတစ်အိတ်ဖြင့် ပတ်ထားသော အထုတ်လေးတစ်ထုပ်ကိုသာ တွေ့ရသည်။

ပလတ်စတစ်အိတ်ကို အလောတကြီးနိုင်စွာ သူဖွင့်ကြည့်လိုက်မိ၏။ တွေ့လိုက်ရတာက သတင်းစာစက္ကူဖြင့် အဖုံးဖုံးထားသော ဗလာစာအုပ်တစ်အုပ်နှင့် အဖြူအစိမ်း ကျောင်းဝတ်စုံ သေးသေးလေးတစ်စုံ။ ဗလာစာအုပ် လေး၏ အဖုံးပေါ်မှ မညီမညာရေးထားသော ကလေးလက်ရေးလေးများက သူ့ရင်ကို လှပ်ခနဲ ဖြစ်စေသည်။

         မောင်ဝဏ္ဏအောင်

         သူငယ်တန်း (ခ)

         အ.မ. က (၇)ကျောင်း။

ကြည့်စမ်း၊ ဒါ... သူ သူငယ်တန်းကျောင်းသားဘ၀က ရေးခဲ့ဖူးသော စာအုပ်လေးပါလား။ ဘာရယ်မှန်းမသိသော ခံစားမှုတစ်ခု၏ လှုပ်နှိုးမှုဖြင့် သူ့ရင်တွေ အခုန်မြန်လာရသည်။ စာအုပ်လေးကို လှန်ကြည့်မိတော့ အထဲမှ လေးကြောင်းမျဉ်း စာမျက်နှာများပေါ်တွင် ငယ်စဉ်က သူကြိုးစားပမ်းစား ရေးထားခဲ့မိသော ၀လုံးလေးများ။ တချို့ က ညီညီညာညာ၊ တချို့က မညီမညာဖြင့်။ စာအုပ်လေးဆုံးအောင် သူလှန်ကြည့်မိတော့ စာအုပ်နောက်ဆုံးမှ လွတ်နေသော စာရွက်ပေါ်တွင် သူငယ်တန်းကျောင်းဝတ်စုံလေးဖြင့် ရိုက်ထားသော သူ့ဓာတ်ပုံလေးကို ကပ်ထား တာ တွေ့လိုက်ရ၏။ ဓာတ်ပုံလေးမှာ အတော်ပင် ဆေးရောင်မှိန်နေခဲ့လေပြီ။ ဓာတ်ပုံလေး၏အောက်မှာတော့ ဖေ ကြီး၏ လက်ရေး သော့သော့လေးများ။

“သားလေး သူငယ်တန်းစတက်တဲ့နေ့အမှတ်တရပုံ၊ ပထမဦးဆုံး ကျောင်းသင်ခန်းစာ စာအုပ်နဲ့ ပထမဦး ဆုံးဝတ်ခဲ့တဲ့ ကျောင်းဝတ်စုံလေး။ သားလေး ပညာတတ်ကြီးဖြစ်ဖို့ ဖေကြီး အမြဲတမ်း ကြိုးစားသွားမယ်”

 ကြည့်စမ်း..၊ ဖေကြီးဟာ သူငယ်ငယ်တုန်းက ကျောင်းသုံးပစ္စည်းလေးများအား ခုချိန်ထိအောင် တယုတယနဲ့ သေချာသိမ်းဆည်းထားဆဲပါလား။ စကားများများမပြောပဲ အမြဲလိုလို သူ့အား မျက်နှာထားတည်တည်ဖြင့်သာ မျက်မှန်ပေါ်ကနေကျော်ပြီး ကြည့်တတ်သော ဖေကြီးရဲ့ရင်ထဲမှာ သူ့အတွက် ချစ်ခြင်းတရား၊ မျှော်လင့်ချက်တို့နှင့် လေးနက်မှုတို့က အပြည့်အသိပ်ပါလား။

ညနေတုန်းက သူ့အား ဖေကြီးလက်သီးဖြင့်ထိုးစဉ် မျက်ရည်တစ်စက်မှ မကျမိခဲ့သော်လည်း အခုတော့ သူ့စိတ်ထဲ မှာ ငိုချင်စိတ်တို့ ပြင်းရှလာခဲ့မိ၏။ ချက်ချင်းဆိုသလို မျက်ရည်တို့ဝဲတက်လာမိသည်။ စာအုပ်လေးကို ပေါင်ပေါ် တင်ထားလိုက်ကာ ငယ်စဉ်က ၀တ်ခဲ့ဖူးသော ကျောင်းဝတ်စုံအဟောင်းလေးအား လက်ဖြင့် အသာအယာ တို့ ထိလိုက်စဉ် သူ့ပါးနှစ်ဖက်ပေါ်သို့ မျက်ရည်စက်တို့ လိမ့်ဆင်းလာခဲ့လေတော့၏။

ဘ၀တစ်လျှောက်လုံး သူ့အား တစ်ခါမှမရိုက်ဖူးခဲ့သော၊ သူ့ကို နာကျင်စရာစကားတွေ မပြောခဲ့ဖူးသော ဖေကြီးက ဒီနေ့ကျမှသူ့အား ကိုယ်ထိလက်ရောက် နာကျင်စေခဲ့တာကို အခုမှ နားလည်လာမိတော့သည်။ သူ့အပေါ်မှာ ပညာရေးနှင့်ပတ်သတ်ပြီး ဖေကြီးက အများကြီးမျှော်လင့်ထားခဲ့သည်ပဲ။ ဒါကြောင့် ဒီနေ့ သူကျောင်းပြေးနေ ခြင်းအား ပထမဦးဆုံးအကြိမ်အဖြစ် ပက်ပင်းတွေ့လိုက်ရပြီးတဲ့နောက် ဖေကြီး အရမ်းဒေါသထွက်သွားခဲ့တာနေ မှာ။ နေပါဦး၊ သူ့အပေါ် ဒီလောက် အလေးအနက်ထားပြီး မျှော်လင့်ခဲ့တဲ့ ဖေကြီးတစ်ယောက် ဒေါသထွက်တာအ ပြင် ဘယ်လောက်အထိများ နာကျင်၊ ၀မ်းနည်းသွားမှာပါလိမ့်။

တွေးရင်း သူတစ်ချက် ရှိုက်လိုက်မိ၏။ ရင်ထဲမှာလည်း နောင်တရမိလာသည်။ စက္ကူဘူးလေးထဲသို့ ပစ္စည်း များအား ခြေရာလက်ရာမပျက်အောင် ဂရုတစ်စိုက်ပြန်ထည့်ကာ ဘူးလေးအား ဗီရိုထဲသို့ ပြန်ထည့်လိုက်၏။ ပြီး နောက် ဗီရိုအား ကျောမီထိုင်ရင်း မျက်ရည်များကိုသုတ်ကာ ဖေကြီး၏အခန်းလေးအား တစ်ချက်ဝေ့ကြည့်မိသည်။

ဖေကြီး၏ တစ်ယောက်အိပ်ကုတင်လေးပေါ်တွင် မွေ့ယာမရှိ။ သင်ဖျူးဖျာလေးတစ်ချပ်သာ ခင်းထားသည်။ ထိုအပေါ်တွင် ခပ်ညစ်ညစ်အရောင်အဆင်းဖြစ်နေသော ခေါင်းအုံးတစ်လုံးနှင့် ချည်စောင်ဟောင်းလေးတစ်ထည် က ခေါက်လျှက်သား။ အပေါ်လိပ်တင်ထားသည့် တစ်ယောက်အိပ် ခြင်ထောင်အနွမ်းလေးကလည်း ကပိုကရိုဖြင့်။ မြေစိုက် တစ်ထပ်ပျဉ်ထောင်အိမ်လေးမို့ သစ်သားအထပ်ထပ်ဖြင့်ရှိနေသော ဖေကြီးအခန်းနံရံတချို့မှာ ပင့်ကူမျှင် တွေက ဟိုဟို ဒီဒီ ငြိတွယ်လျှက်။

သူပိုပြီး ၀မ်းနည်းသွားမိ၏။ သူ့ကိုမွေးပြီးသုံးနှစ်အကြာတွင် မေကြီးက ဆုံးပါးသွားခဲ့တာမို့ ငယ်စဉ်ကတည်းက ဖေကြီးနှင့်အတူတူ တစ်ခန်းထဲအိပ်ခဲ့ရသော်လည်း သူအလယ်တန်းကျောင်းသားဘ၀ ရောက်ချိန်မှစပြီး ဖေ ကြီးနှင့် အခန်းခွဲအိပ်ခဲ့ရသည်။ ထိုအချိန်မှစ,ပြီးခုထိ ဖေကြီးအခန်းကို သူသေသေချာချာ ၀င်မကြည့်ဖြစ်ခဲ့သလို၊ သိပ်လည်း မ၀င်ဖြစ်ခဲ့တော့။

ခုမှ ဖေကြီးအခန်းကို သူသေသေချာချာ ကြည့်မိ၏။ ကြည့်ရင်းသိလာရသည်မှာ ဖေကြီးအခန်းက သူ့အခန်းနှင့် တော်တော်လေး ကွာခြားနေခဲ့ခြင်းသာပင်။ ဟုတ်သည်၊ သူ့အခန်းက ဖေကြီးအခန်းထက် နည်းနည်းကျယ်၏။ သစ်သားပျဉ်ထောင်အိမ်ဖြစ်သော်လည်း ဖေကြီးက သူ့အခန်းပတ်ပတ်လည်တွင် သုံးထပ်သားများထပ်ကာပြီး နံရံ များကို ညီညီညာညာ၊ သပ်သပ်ရပ်ရပ်ဖြစ်စေလျှက် ရေဆေးအပြာနုရောင်လေးတောင် သုတ်ထားပေးသေးသည်။ နောက်ပြီး သူအိပ်ရန်အတွက် ရေမြှုပ်မွေ့ယာအကောင်းစား၊ အ၀တ်ထည့်ရန်အတွက် ကျွန်းဗီရိုတစ်လုံး၊ စာကြည့်  ရန်အတွက် စာကြည့်စားပွဲနှင့် ဆိုဖာအပါးစား ဆုံလည်ကုလားထိုင် စသည်တို့သာမက၊ သူပူဆာ၍ လက်ပ်တော့ ကွန်ပျူတာတစ်လုံး၊ သီချင်းနားထောင်ရန် မီနီဟုမ်းသီရေတာလေးတစ်စုံတို့ကိုပင် ၀ယ်ပေးထား၏။ ဒါတင်မက သေး ပျဉ်ခင်းကြမ်းပြင်ပေါ်တွင် မီးခိုးရောင် ဂုန်နီကော်ဇောလေးကို ခင်းထားပေးပြန်သေးသည်။ ထို့ကြောင့် ပြောရ မည်ဆိုလျှင် သူ့အခန်းလေးက တိုက်ခန်းလေးလို ဖြစ်နေခဲ့တာအမှန်။ သို့သော်.. အခု သူမြင်နေရသော ဖေကြီး၏ အခန်းလေးကတော့ဖြင့် မှုန်ကုပ်ကုပ်နိုင်လွန်းလှစွာ၊ အဆင်တန်ဆာမဲ့လွန်းလှစွာ။

ဖေကြီးရယ်၊ ကိုယ်တိုင်က ဖြစ်သလိုနေပြီး သားအတွက်တော့ အစစအရာရာ ပြည့်စုံစေခဲ့သတဲ့လားဗျာ။

မေကြီးမရှိတော့တာ နှစ်တွေကြာခဲ့ပြီဖြစ်သော်လည်း နောက်အိမ်ထောင်ထပ်မပြုပဲ သူ့အား တစ်ယောက်တည်း ပြုစုစောင့်ရှောက်ခဲ့သော ဖေကြီး။ အိမ်ထောင်ကျတာ နောက်ကျခဲ့တာမို့ သူ့အသက်နှစ်ဆယ်အရွယ်မှာ ဖေကြီးက အသက်ခြောက်ဆယ်ဝန်းကျင် ဖြစ်နေခဲ့သော်လည်း၊ အခုထိ သူ့အား အငှားတက္ကစီမောင်းရင်း ရိုးရိုး သားသား ရှာဖွေကျွေးမွေးကာ ပညာသင်ပေးနေဆဲဖြစ်သော ဖေကြီး။ နောက်ပြီး... သူမှတ်မိခဲ့သမျှ ကျောင်းသား ဘ၀တစ်လျှောက်လုံး သူငယ်ချင်းတွေကြားထဲမှာ သူ့မျက်နှာမငယ်ရစေအောင်၊ အမြဲ ပြည့်ပြည့်စုံစုံ ဖြစ်နေရလေ အောင် မရှိ ရှိတာရှာကြံပြီး ဖန်တီးပေးခဲ့လေသော ဖေကြီး။ ခုချိန်ထိ ကားမောင်းမထွက်ခင် မနက်အစော ကြီးထ, ပြီး သူ့အား မညည်းမညူ ချက်ပြုတ်ကျွေးနေဆဲဖြစ်သော ဖေကြီး။ ဒီလိုအဖေမျိုးကိုမှ တစ်လွဲမာနဖြင့် စွန့်ခွာထား ရစ်ခဲ့ဖို့ သူကြံစည်မိခဲ့၏။ တွေးရင်း သူ့ရင်ထဲတွင် နောင်တ,တရားတို့ဖြင့် နာကျင်ကာ ဆို့နင့်လှိုက်မောလာရတော့ သည်။

ကျောပိုးအိတ်ကို လက်မှဆွဲကာ သူ့အခန်းသို့ ပြန်ခဲ့လိုက်သည်။ ဗီရိုကိုပြန်ဖွင့်ပြီး ကျောပိုးအိတ်ထဲမှ အ၀တ် အစားများကို ပြန်ထည့်နေစဉ် အိမ်ရှေ့တံခါးဖွင့်သံ ကြားလိုက်ရ၏။ သူ့ခန္ဓာကိုယ်တစ်ခုလုံး ဆတ်ခနဲ တုန်ခါသွား မိသည်။ ဖေကြီး ပြန်လာပြီ ထင်သည်။ လုပ်လက်စအလုပ်ကို ရပ်ကာ အိပ်ခန်းအပြင်သို့ သူပြေးထွက်ခဲ့လိုက်၏။ ဟုတ်သည်...၊ ဖေကြီးကို သူဝန်ချ တောင်းပန်ချင်လှပြီ။

 သူအိမ်ရှေ့ရောက်ခဲ့တော့ အိမ်တံခါးမကြီးအား အတွင်းမှနေ သေချာပြန်စေ့ပိတ်နေသော ဖေကြီး၏ကျောပြင်ကို တွေ့လိုက်ရ၏။ အုံနာအိမ်မှာ ကားထားခဲ့ပြီး ဘတ်စ်ကားစီးကာ မိုးရေထဲမှာ ပြန်လာခဲ့ရတာမို့ ဖေကြီး၏ ပု ဆိုးအောက်နားစတွေက စိုရွှဲနေခဲ့သည်။ ဧည့်ခန်းမှ မီးချောင်းရောင်အောက်တွင် ဖေကြီး၏ဆံပင်တိုတိုလေးများ က ငွေမင်ရောင်တွေ စွန်းထင်းနေခဲ့တာကို ဒီညတော့ သူသေသေချာချာ သတိထားမိလိုက်၏။

 ခြေလှမ်း ငါးလှမ်းလောက်အကွာအဝေးတွင်ရှိသော ဖေကြီးဆီသို့ တစ်ဟုန်ထိုးပြေးသွားမိရင်း နောက်ကျော ပြင်ဘက်မှနေ ဖေကြီးအား သူသိုင်းဖက်ပစ်လိုက်မိသည်။ ရုတ်တရက်မို့ ဖေကြီက အံ့သြသင့်ဟန်ဖြင့် ခဏတော့ ငြိမ်နေ၏။ နောက်... ဖက်တွယ်ထားသော သူ့လက်များအား ဒေါသ မပြေသေးသလို အတင်းဆွဲဖယ်လာသည်။ သို့သော် သူလွှတ်မပေး။ ခေါင်းခါငြင်းဆန်ရင်း ပိုပြီး တင်းကျပ်နေအောင် ဖက်တွယ်ထားလိုက်မိ၏။ ကျောပြင်ကို ပါးအပ်ထားမိရင်း ဖေကြီးအား တစ်ခုခုပြောကာ တောင်းပန်ချင်သော်လည်း လည်ချောင်းဝအထိတက်လာသော စကားလုံးများက သူ့နှုတ်ဖျားမှနေ ထွက်ကျမလာနိုင်ခဲ့။ သို့သော် မျက်ရည်တို့က ပါးပြင်ပေါ်သို့ အတားအဆီးမဲ့စွာ စီးကျလာခဲ့ကြ၏။ သူ,မထိန်းလိုက်နိုင်ခင် ရှိုက်သံတို့က ထွက်ပေါ်လာကြပြန်သည်။

သူ့ရှိုက်သံကြောင့်လား မသိ။ ဖေကြီးက သူ့လက်များအား ဆွဲမဖယ်တော့ပဲ ငြိမ်သွား၏။ နောက် သူ့ဘက်သို့ မျက်နှာချင်းဆိုင်ဖြစ်အောင် ဖြည်းညင်းစွာ လှည့်လာပြီး တသိမ့်သိမ့် ငိုနေမိသော သူ့အား နွေးထွေးကြင်နာစွာ ပြန်သိုင်းဖက်လာသည်။ နောက်.. သက်ပြင်းမောတစ်ချက်ကို ကြိတ်ချရင်း သူ့ကျောပြင်အား ခပ်ဖွဖွလေး ပုတ်ပေး နေတော့၏။ ဘာစကားမှတော့ မပြော။

ခုမှ ပိုပြီး သူငိုချင်လာမိသည်။ ထို့ကြောင့် ဖေကြီး၏ ရင်ဘတ်ကို ခေါင်းမှီပြီး သူအားရပါးရ ငိုချလိုက်သည်။ နွေးထွေးသော ရင်ရိပ်အားခိုမိစဉ် ရင်ဘတ်အောက်မှ တဒိတ်ဒိတ်ဖြင့် သွေးတိုးနေသော ဖေကြီး၏ နှလုံးခုန်သံကို သူအတိုင်းသား ကြားနေခဲ့ရပါသည်။ ထိုသံစဉ်ထဲတွင် သူ့အတွက် အမြဲခွင့်လွှတ်ခြင်း၊ ချစ်ကြင်နာခြင်း စသည်တို့ အပြည့်အ၀ပါနေသည်ဟု ခံစားနားလည်မိသော်လည်း ငိုလို့ကောင်းတုန်းမို့ မှားမိခဲ့သည့် အမှားများအတွက် ဖေ ကြီးကို သူဘာတစ်ခွန်းမှ မတောင်းပန်နိုင်ခဲ့သေး။ ဖေကြီး၏ကတော့ သူ့ကို တင်းတင်းကျပ်ကျပ် ပွေ့ဖက်ထားရင်း နွေးထွေးသော လက်ဖ၀ါးများဖြင့် သူ့ကျောပြင်အား ညင်ညင်သာသာလေး ပွတ်သပ်ပေးနေခဲ့လေ၏။     ။

-------------------------

ချစ်ခြင်းအားဖြင့်...

ဏီလင်းညို

(ကမ္ဘာတည်မယ့်ကဗျာ)

22^nd July, 2013. Monday. 23: 35.

 Yangon – Myanmar.